சர்வதேச எரிசக்தி விநியோகத்தின் உயிர்நாடியாக விளங்கும் ஹார்முஸ் ஜலசந்தி (Strait of Hormuz) வழியாகச் செல்லும் வணிகக் கப்பல்களுக்கு 20 சதவீதப் பாதுகாப்புக் கட்டணம் விதிக்கப்படும் என அறிவித்த ஒரே நாளில், அமெரிக்க அதிபர் டொனால்ட் டிரம்ப் தனது அதிரடி முடிவை வாபஸ் பெற்று சர்வதேச அரங்கில் பெரும் பரபரப்பை ஏற்படுத்தியுள்ளார். வளைகுடா பிராந்தியத்தின் நட்பு நாடுகளான சவூதி அரேபியா, ஐக்கிய அரபு அமீரகம், கத்தார் உள்ளிட்ட நாடுகளின் தலைவர்கள் தன்னிடம் தொலைபேசி வாயிலாகப் பேசியதைத் தொடர்ந்து இந்த வரிக்கட்டணத் திட்டம் ரத்து செய்யப்படுவதாக அவர் அறிவித்துள்ளார். மேலும், இந்தச் சுங்கக் கட்டணத்திற்குப் மாற்றாக, வளைகுடா அரபு நாடுகள் அமெரிக்காவில் பில்லியன் கணக்கில் முதலீடு செய்யும் வகையிலான மெகா வர்த்தக மற்றும் முதலீட்டு ஒப்பந்தங்களை (Trade and Investment Deals) மேற்கொள்ளத் திட்டமிட்டுள்ளதாகவும் டிரம்ப் அதிகாரப்பூர்வமாகத் தெரிவித்துள்ளார்.
ஈரானுடனான மோதல் உச்சகட்டத்தை எட்டியுள்ள நிலையில், ஹார்முஸ் ஜலசந்தியைத் தனது கட்டுப்பாட்டிற்குள் கொண்டு வந்து வணிகக் கப்பல்களுக்கு அமெரிக்கா பாதுகாப்பு அளிக்கும் என்றும், அதற்காகச் சரக்குகளின் மதிப்பில் 20 சதவீதத்தை ‘அமெரிக்க மறுபயன்பாட்டுக் கட்டணமாக’ (US Reimbursement Fee) வசூலிப்போம் என்றும் டிரம்ப் திங்கள்கிழமை அறிவித்திருந்தார். இந்தத் தன்னிச்சையான அறிவிப்பு கச்சா எண்ணெய் சந்தையில் பெரும் அதிர்வலைகளை ஏற்படுத்தியதோடு, சர்வதேச கப்பல் போக்குவரத்து அமைப்புகளின் கடும் எதிர்ப்பையும் சம்பாதித்தது. இந்தச் சூழலில், தனது ட்ரூத் சோஷியல் (Truth Social) தளத்தில் புதிய பதிவை வெளியிட்டுள்ள டிரம்ப், “மத்திய கிழக்கு நாடுகளின் மன்னர்கள் மற்றும் எமிர்களுடன் நடத்திய ஆக்கப்பூர்வமான பேச்சுவார்த்தைக்குப் பிறகு, இந்த 20 சதவீதக் கட்டண திட்டத்தைக் கைவிடுகிறேன்; உலகளாவிய நீர்வழிப்பாதைக்கு யாரும் கட்டணம் வசூலிக்கக் கூடாது என்பதில் எனக்கு உடன்பாடு உள்ளது, அதற்குப் பதிலாக வளைகுடா நாடுகள் அமெரிக்காவில் பிரம்மாண்டமான (Massive) முதலீடுகளைச் செய்ய சம்மதித்துள்ளன” எனக் குறிப்பிட்டுள்ளார்.
அதே நேரத்தில், பிராந்தியத்தில் பதற்றத்தைத் தணிக்கும் இடைக்கால அமைதி ஒப்பந்தம் முறிந்ததைத் தொடர்ந்து, ஈரான் மீதான தனது பிடியை அமெரிக்கா மேலும் இறுக்கியுள்ளது. ஹார்முஸ் ஜலசந்தி பிற உலக நாடுகளின் கப்பல் போக்குவரத்துக்குத் தடையின்றித் திறந்திருக்கும் எனக் கூறியுள்ள டிரம்ப், ஈரான் துறைமுகங்களுக்குச் செல்லும் அல்லது அங்கிருந்து வரும் கப்பல்கள் மற்றும் ஈரானிய சரக்குகளை ஏற்றிச் செல்லும் கப்பல்களுக்கு எதிராகப் பூரண கடல்வழி முற்றுகை (FULL Blockade) இன்று நள்ளிரவு முதல் அமலுக்கு வரும் என எச்சரித்துள்ளார். டிரம்ப்பின் இந்த திடீர் பின்வாங்கலும், வளைகுடா நாடுகளுடனான புதிய வர்த்தக டீலும் உலகளாவிய பொருளாதாரச் சந்தையில் கச்சா எண்ணெய் விலையைத் தக்கவைக்க உதவும் என்றாலும், ஈரானுக்கு எதிரான முழுமையான முற்றுகை மத்திய கிழக்குக் கடற்பகுதியில் எந்த நேரமும் யுத்த மேகங்கள் சூழும் அபாயத்தை அதிகரித்துள்ளதாக சர்வதேச அரசியல் நோக்கர்கள் கருதுகின்றனர்.
