ஆம்னி பேருந்து கட்டணக் கொள்ளை: சென்னை கிளாம்பாக்கம் கலைஞர் நூற்றாண்டு பேருந்து முனையத்தில் தமிழ்நாடு போக்குவரத்துத்துறை செயலாளர் நிர்மல்ராஜ் ஆய்வு மேற்கொண்டார். ஆய்வுக்குப் பின்னர் பேருந்து நிலைய அதிகாரிகளுடன் ஆலோசனை நடத்திய அவர், பின்னர் செய்தியாளர்களைச் சந்தித்துப் பேசினார்.
அப்போது பண்டிகை காலங்களில் ஆம்னி பேருந்துகளில் வசூலிக்கப்படும் அதிகப்படியான கட்டணம் குறித்து செய்தியாளர்கள் கேள்வி எழுப்பினர். அதற்கு நிர்மல்ராஜ் அளித்த பதில் தற்போது சர்ச்சையை ஏற்படுத்தியுள்ளது.
ஆம்னி பேருந்துகள் தொடர்பான கட்டுப்பாடு தனது வரம்பிற்குள் வராது என்றும், தான் போக்குவரத்துத்துறை செயலாளர் மட்டுமே என்றும், இதுதொடர்பாக போக்குவரத்து ஆணையர்தான் முடிவெடுக்க வேண்டும் என்றும் அவர் தெரிவித்தார்.
மேலும், ஆம்னி பேருந்து நிறுவனங்களுடன் ஒட்டுமொத்தமாகக் கூட்டம் நடத்தி பேச்சுவார்த்தை நடத்துவோம் என்றும், அவர்கள் அதற்கு சம்மதித்துவிட்டு பின்னர் சற்று அதிகமான கட்டணத்தை வைத்து விற்பனை செய்வது வழக்கம் என்றும் நிர்மல்ராஜ் பேசினார்.
ஆம்னி பேருந்துகளில் பண்டிகை காலங்களில் அதிக கட்டணம் வசூலிக்கப்படுவது குறித்து பொறுப்புடன் பதிலளிக்க வேண்டிய உயர் அதிகாரி, அலட்சியமான முறையில் பதிலளித்ததாக விமர்சனங்கள் எழுந்துள்ளன. அவரது பேச்சு, அதிகப்படியான கட்டண வசூலைத் தடுக்க முடியாது என்ற தொனியில் இருப்பதாகவும் சமூக வலைதளங்களில் பலர் கருத்து தெரிவித்து வருகின்றனர்.
இதுதொடர்பான காட்சிகள் தற்போது சமூக வலைதளங்களில் வேகமாகப் பரவி வருகின்றன.
ஆம்னி பேருந்து உரிமையாளர்களுடன் அரசு அதிகாரிகள் நடத்தும் ஆலோசனைக் கூட்டங்கள் வெறும் கண்துடைப்பு நடவடிக்கைகளா? என்ற கேள்வியையும் சமூக ஆர்வலர்கள் எழுப்பி வருகின்றனர். பண்டிகை காலங்களில் பொதுமக்களை பாதிக்கும் அதிகப்படியான பேருந்து கட்டணத்தைத் தடுக்க அரசு உரிய நடவடிக்கை எடுக்க வேண்டும் என்றும் அவர்கள் வலியுறுத்தி வருகின்றனர்.
உயர் அதிகாரியின் இந்தப் பேச்சு தற்போது தமிழக அரசியல் மற்றும் போக்குவரத்துத்துறை வட்டாரத்தில் பரபரப்பை ஏற்படுத்தியுள்ளது.
#ஆம்னிபேருந்து #ஆம்னிபேருந்துகட்டணம் #கட்டணக்கொள்ளை #கிளாம்பாக்கம் #போக்குவரத்துத்துறை #நிர்மல்ராஜ் #கலைஞர்நூற்றாண்டுபேருந்துமுனையம் #பேருந்துகட்டணம் #பண்டிகைகாலம் #பயணிகள் #பொதுமக்கள் #சமூகஊடகம் #வீடியோவைரல் #தமிழ்நாடு #சென்னை #போக்குவரத்து #அரசுஅதிகாரி #சமூகஆர்வலர்கள் #ஆம்னிபேருந்துகட்டணஉயர்வு #கிளாம்பாக்கம்செய்திகள்
