கிளாம்பாக்கம் கலைஞர் நூற்றாண்டு பேருந்து நிலையத்தில் தமிழ்நாடு அரசு போக்குவரத்துத்துறை செயலாளர் நிர்மல்ராஜ் திடீர் ஆய்வு மேற்கொண்டார்.

ஆயுத பூஜை, விஜயதசமி மற்றும் தீபாவளி பண்டிகைகளை முன்னிட்டு தொடர் விடுமுறைகள் வரவுள்ள நிலையில், பொதுமக்கள் எந்தவித சிரமமும் இன்றி தென் மாவட்டங்களுக்குப் பயணம் செய்வதற்காக மேற்கொள்ளப்பட்டுள்ள பாதுகாப்பு மற்றும் போக்குவரத்து ஏற்பாடுகள் குறித்து ஆய்வு நடத்தப்பட்டது.

இதுதொடர்பாக போக்குவரத்துத்துறை, போக்குவரத்துக் காவல்துறை மற்றும் பெருநகர வளர்ச்சிக் குழும அதிகாரிகளுடன் நிர்மல்ராஜ் தீவிர ஆலோசனை மேற்கொண்டார். விநாயகர் சதுர்த்தி பண்டிகைக்காக மேற்கொள்ளப்பட்ட ஏற்பாடுகள் குறித்தும் ஆய்வு செய்த அவர், ஆயுத பூஜை மற்றும் தீபாவளி விடுமுறை நாட்களில் மேற்கொள்ள வேண்டிய சிறப்பு ஏற்பாடுகள் குறித்து அதிகாரிகளுக்கு பல்வேறு அறிவுறுத்தல்களை வழங்கினார்.

பின்னர் செய்தியாளர்களிடம் பேசிய நிர்மல்ராஜ், கிளாம்பாக்கத்தில் இருந்து தினசரி வழக்கமாக இயக்கப்படும் 1,100 பேருந்துகளுடன், விழாக்கால சிறப்புப் பேருந்துகளாக கூடுதலாக 1,200 பேருந்துகள் இயக்கப்படுவதாக தெரிவித்தார். இதன்படி மொத்தம் 2,300 பேருந்துகள் இயக்கப்பட்டு வருகின்றன.

தொடர் விடுமுறையை முன்னிட்டு கடந்த இரண்டு நாட்களாக அதிகாலை 2 மணி வரை பேருந்துகள் தடையின்றி தொடர்ந்து இயக்கப்பட்டதாகவும், இன்றும் சிறப்புப் பேருந்துகள் இயக்கப்பட்டு வருவதாகவும் அவர் கூறினார்.

விடுமுறை முடிந்து செவ்வாய்க்கிழமை தென் மாவட்டங்களில் இருந்து சென்னைக்குத் திரும்பும் பயணிகளின் எண்ணிக்கை அதிகமாக இருக்கும் என்பதால், அதற்கேற்ப சிறப்புப் பேருந்துகளை இயக்கத் திட்டமிடப்பட்டுள்ளதாகவும் தெரிவித்தார்.

முன்பதிவு செய்யப்பட்ட அரசுப் பேருந்துகள் சரியான நேரத்தில் பேருந்து நிலையத்திற்குள் வரவில்லை என்ற குற்றச்சாட்டு குறித்து விசாரணை நடத்தப்படும் என்றும், ஆய்வின்போது இதுபோன்ற சிக்கல்கள் எதுவும் கண்டறியப்படவில்லை என்றும் நிர்மல்ராஜ் தெரிவித்தார்.

ஓட்டுநர்கள் ஓய்வெடுக்கச் செல்லும் நேரத்தில் பயணிகள் பேருந்துகளுக்குள் ஏறி அமர்வதால், பேருந்து புறப்படும் நேரம் குறித்து குழப்பம் ஏற்படுவதாகவும் அவர் விளக்கினார். இதனைத் தவிர்க்க பேருந்துகள் புறப்படும் நேரத்தை அறிவிப்புப் பலகையில் வெளியிடவும், அதிகாரிகள் மைக் மூலம் அறிவிக்கவும் உத்தரவிடப்பட்டுள்ளதாக தெரிவித்தார்.

மேலும், பேருந்து விவரங்களைக் கேட்கும் பொதுமக்களிடம், அதிகாரிகள் கடுமையாக நடந்து கொண்டால், அது குறித்து உடனடியாக புகார் தெரிவிக்கலாம் என்றும், முறைகேடாக நடந்து கொள்ளும் அதிகாரிகள் மீது தகுந்த நடவடிக்கை எடுக்கப்படும் என்றும் நிர்மல்ராஜ் எச்சரித்தார்.

பயணிகள் போக்குவரத்து நெரிசல் மற்றும் பிற சிரமங்கள் இன்றி பாதுகாப்பாகப் பயணம் செய்வதை உறுதி செய்யும் வகையிலேயே, இந்த ஆய்வு மேற்கொள்ளப்பட்டுள்ளதாக, அவர் தெரிவித்தார்.

#கிளாம்பாக்கம் #கிளாம்பாக்கம்பேருந்துநிலையம் #கலைஞர்நூற்றாண்டுபேருந்துநிலையம் #சிறப்புபேருந்துகள் #அரசுபேருந்து #போக்குவரத்து #தமிழ்நாடுபோக்குவரத்துத்துறை #நிர்மல்ராஜ் #ஆயுதபூஜை #விஜயதசமி #தீபாவளி #தொடர்விடுமுறை #தென்மாவட்டங்கள் #சென்னை #பேருந்துநிலையம் #பயணிகள் #போக்குவரத்துஏற்பாடுகள் #பாதுகாப்புஏற்பாடுகள் #பேருந்துபயணம் #தமிழ்நாடு