கரூர் கூட்ட நெரிசல் விபத்தில் பலியானவர்களின் குடும்பத்தினருக்குக் கருணை அடிப்படையில் அரசுப் பணி வழங்கிய தமிழக அரசின் நடவடிக்கையைக் கடுமையாக விமரிசித்துள்ள சென்னை உயர் நீதிமன்ற மதுரை கிளை, “கூட்ட நெரிசலில் இறந்தவர்களின் குடும்பத்திற்கு அரசுப் பணி என்றால், பேருந்து விபத்து மற்றும் சிவகாசி வெடி விபத்துகளில் பலியாகும் நபர்களின் குடும்பத்தினருக்கும் அரசுப் பணி வழங்குவீர்களா?” எனக் காரசாரமானக் கேள்வியை எழுப்பியுள்ளது.
கரூரில் நடைபெற்ற கூட்ட நெரிசலில் சிக்கி உயிரிழந்தவர்களின் குடும்பங்களுக்கு நிவாரண நிதியுடன் சேர்த்து, அவர்களின் வாழ்வாதாரத்தைப் பாதுகாக்கும் பொருட்டுத் தமிழக அரசின் சார்பில் கருணை அடிப்படையில் அரசுப் பணிகள் வழங்கப்பட்டன. இத்தகைய பணி நியமனங்களை எதிர்த்துத் தொடரப்பட்ட வழக்கினை விசாரித்த உயர் நீதிமன்ற மதுரை கிளை, விதிமுறைகளைச் சுட்டிக்காட்டி அந்த அரசுப் பணி நியமனங்கள் செல்லாது எனத் தீர்ப்பளித்து, அதனை ரத்து செய்ய உத்தரவிட்டது.
நீதிமன்றத்தின் இந்த அதிரடித் தீர்ப்பைத் தொடர்ந்து, கரூர் நெரிசல் விபத்தில் பாதிக்கப்பட்டக் குடும்பங்களுக்கு வழங்கப்பட்ட அரசுப் பணி உத்தரவு ரத்து செய்யப்பட்டுள்ளது. இந்நிலையில், உயர் நீதிமன்ற மதுரை கிளையின் இந்த உத்தரவை எதிர்த்து, நாளை (ஜூலை 28) உச்ச நீதிமன்றத்தில் (Supreme Court) சிறப்பு விடுப்பு மனு (SLP) தாக்கல் செய்து மேல்முறையீடு செய்யத் தமிழக அரசு அதிரடி முடிவு செய்துள்ளது.
பாதிக்கப்பட்ட ஏழை எளிய குடும்பங்களின் வாழ்வாதாரத்தை உறுதி செய்யவே கருணை அடிப்படையில் பணி நியமனங்கள் வழங்கப்பட்டதாகவும், நீதிமன்ற உத்தரவால் அக்குடும்பங்கள் வீதிக்குத் தள்ளப்படும் நிலை ஏற்பட்டுள்ளதாகவும் சுட்டிக்காட்டித் தமிழக அரசு உச்ச நீதிமன்றத்தை அணுகவுள்ளது. இந்த மேல்முறையீட்டு நடவடிக்கை அரசியல் மற்றும் சமூக வட்டாரங்களில் பெரும் எதிர்பார்ப்பை ஏற்படுத்தியுள்ளது.
