தமிழக முதல்வர் விஜய் இன்று மாலை சென்னை மெட்ரோ ரயிலில் சாதாரணப் பயணியைப் போலப் பயணித்து, மெட்ரோ 2-ஆம் கட்டப் பணிகள் மற்றும் உள்கட்டமைப்பு வசதிகளைப் பல்வேறு இடங்களில் நேரில் பார்வையிட்டுத் திடீர் ஆய்வுகளை மேற்கொண்டார்.
தலைமைச் செயலகத்தில் இருந்து இன்று மாலை காரில் புறப்பட்ட முதல்வர் விஜய், அரசினர் தோட்டம் மெட்ரோ ரயில் நிலையத்திற்கு வந்தார். அங்குத் தானியங்கி இயந்திரம் மூலம் மெட்ரோ பயணச்சீட்டைப் பெற்றுக்கொண்டு, சாதாரணப் பயணிகளுடன் ரயிலில் ஏறி நந்தனம் மெட்ரோ ரயில் நிலையம் வரை பயணித்தார். மெட்ரோ ரயிலில் முதல்வரைக் கண்ட பயணிகள் பெரும் ஆச்சரியமும் உற்சாகமும் அடைந்தனர். பயணத்தின் போது தங்களின் அனுபவங்களையும் கோரிக்கைகளையும் பகிர்ந்து கொண்ட மக்களுடன் முதல்வர் மிக எளிமையாகக் கலந்துரையாடினார். மேலும் பயணிகள் அவருடன் ஆர்வத்துடன் புகைப்படங்களும் செல்ஃபிக்களும் எடுத்து மகிழ்ந்தனர்.
நந்தனம் ரயில் நிலையத்தில் இறங்கிய முதல்வர் விஜய், அங்கு அமைந்துள்ள சென்னை மெட்ரோ ரயில் நிறுவனத்தின் தலைமையகத்திற்கு நேரில் சென்றார். அங்கு மெட்ரோ துறை உயர் அதிகாரிகளுடன் 2-ஆம் கட்ட மெட்ரோ ரயில் திட்டப் பணிகள் எந்த அளவில் நடைபெற்று வருகின்றன என்பது குறித்து விரிவான ஆலோசனை நடத்தினார். அதனைத் தொடர்ந்து நந்தனத்திலிருந்து காரில் கிண்டி கத்திப்பாரா பகுதிக்குச் சென்ற முதல்வர், அங்கு சுமார் 101 அடி உயரத்தில் பிரம்மாண்டமாகக் கட்டப்பட்டுள்ள அதிநவீன மெட்ரோ பாலத்தின் அமைப்பையும் அதன் பாதுகாப்பு அம்சங்களையும் நேரில் பார்வையிட்டு ஆய்வு செய்தார்.
அதன் தொடர்ச்சியாக, கிண்டியிலிருந்து சாலை மார்க்கமாக போரூர் சென்றடைந்த அவர், மெட்ரோ 2-ஆம் கட்ட வழித்தடத்தில் புதிதாக அறிமுகப்படுத்தப்படவுள்ள ஓட்டுநர் இல்லாத (Driverless) அதிநவீன மெட்ரோ ரயிலில் ஏறிப் பூந்தமல்லி வரை பயணித்துத் தொழில்நுட்ப சோதனைகளை ஆய்வு செய்தார். பின்னர் அங்கிருந்து மீண்டும் அதே ஆளில்லா ரயிலில் போரூர் வரை பயணித்துத் தனது கள ஆய்வை நிறைவு செய்தார். தமிழக முதல்வர் மெட்ரோ ரயில் நிலையங்கள் மற்றும் சாலைகளில் கள ஆய்வு மேற்கொண்ட தகவல் அறிந்து திரண்ட ஏராளமான பொதுமக்கள் அவருக்கு வாழ்த்து முழக்கங்களை எழுப்பி உற்சாக வரவேற்பு அளித்தனர்.
