செங்கல்பட்டு மாவட்டம் பொத்தேரி அருகே SRM கல்லூரி விடுதியில், சட்டவிரோதமாகக் கஞ்சா மற்றும் போதைப் பொருட்களை பதுக்கி வைத்திருந்த 3 மாணவர்களை மறைமலைநகர் காவல்துறையினர் அதிரடியாகக் கைது செய்துள்ளனர். கல்வி நிறுவனங்களை ஒட்டிய பகுதிகளில் போதைப்பொருள் புழக்கத்தைத் தடுக்கும் நோக்கில் நடத்தப்பட்ட இந்த நள்ளிரவுச் சோதனை, அப்பகுதியில் பெரும் பரபரப்பை ஏற்படுத்தியுள்ளது.
பொத்தேரி சுற்றுவட்டாரப் பகுதிகளில் உள்ள சில கல்லூரி விடுதிகளில், மாணவர்கள் அதிக அளவில் கஞ்சா உள்ளிட்ட போதை வஸ்துகளைப் பயன்படுத்தி வருவதாகவும், அங்குப் போதைப்பொருள் கடத்தல் கும்பலின் ஊடுருவல் இருப்பதாகவும் மறைமலைநகர் காவல் துறையினருக்கு ரகசியத் தகவல் கிடைத்தது. இந்தத் துல்லியமான தகவலின் அடிப்படையில் சம்பவ இடத்திற்கு விரைந்த தனிப்படை போலீசார், SRM கல்லூரி விடுதி வளாகத்திற்குள் அதிரடியாக நுழைந்து தீவிரச் சோதனையில் ஈடுபட்டனர்.
மாணவர்களின் அறைகளில் அதிரடியாக நடத்தப்பட்ட இந்தச் சோதனையின் போது, அங்குத் தங்கியிருந்த மூன்று கல்லூரி மாணவர்கள் சட்டவிரோதமாகக் கஞ்சா பொட்டலங்களைப் பதுக்கி வைத்திருந்தது தெரியவந்தது. இதனைத் தொடர்ந்து, அவர்கள் மூன்று பேரையும் போலீசார் உடனடியாக கைது செய்து காவல் நிலையத்திற்கு அழைத்து வந்தனர்.
கைது செய்யப்பட்ட கல்லூரி மாணவர்களிடம் போதைப்பொருள் தடுப்புப் பிரிவு மற்றும் மறைமலைநகர் போலீசார் தங்களது பாணியில் தீவிர விசாரணை மேற்கொண்டு வருகின்றனர். கல்லூரி மாணவர்களைக் குறிவைத்து இந்த நச்சுக்கலாச்சாரத்தைப் பரப்பும் முக்கியக் கஞ்சா வியாபாரிகள் யார்? ஆந்திரா அல்லது பிற மாநில எல்லைகளிலிருந்து எந்தெந்த வழிகளில் இந்த போதைப்பொருள் கடத்தி வரப்படுகிறது? மற்றும் இந்த நெட்வொர்க்கில் தொடர்புடைய பிற நபர்கள் யார்? என்பது குறித்து போலீசார் மாணவர்களிடம் துருவித் துருவி விசாரணை நடத்தி வருகின்றனர். தமிழகத்தில் போதைப்பொருள் நடமாட்டத்திற்கு எதிராகத் தவெக அரசு கடுமையான இரும்புக்கரம் கொண்டு நடவடிக்கை எடுத்து வரும் சூழலில், கல்லூரி விடுதியிலேயே மாணவர்கள் கஞ்சாவுடன் பிடிபட்ட சம்பவம் பெற்றோர்கள் மற்றும் கல்வி வட்டாரங்கள் மத்தியில் பெரும் அதிர்ச்சியை ஏற்படுத்தியுள்ளது.
