திருப்போரூர் தாலுகாவில் வாகனங்களின் எண்ணிக்கையும் மக்கள் தொகையும் அதிகரித்துள்ள நிலையில், மோட்டார் வாகன ஆய்வாளர்  அலுவலகம் அமைக்க வேண்டும் என்ற கோரிக்கை வலுத்துள்ளது.

🚗 அதிகரிக்கும் வாகனங்கள்… அலுவலகம் இல்லை

செங்கல்பட்டு மாவட்டம் திருப்போரூர் தாலுகாவில் 50-க்கும் மேற்பட்ட கிராமங்கள், ஆறு குறுவட்டங்கள் மற்றும் ஒரு பேரூராட்சி அமைந்துள்ளன. மக்கள் தொகையும் வாகனங்களின் எண்ணிக்கையும் தொடர்ந்து அதிகரித்து வரும் நிலையில், இப்பகுதியில் மோட்டார் வாகன ஆய்வாளர் (எம்விஐ) யூனிட் அலுவலகம் இல்லாததால் பொதுமக்கள் சிரமம் அடைந்து வருகின்றனர். ஓட்டுநர் உரிமம், புதிய வாகன பதிவு, பழகுநர் உரிமம், தடையில்லா சான்று உள்ளிட்ட பணிகளுக்காக தினமும் நூற்றுக்கணக்கானோர் பரனூர் வட்டார போக்குவரத்து அலுவலகத்திற்கோ அல்லது திருக்கழுக்குன்றம் அலுவலகத்திற்கோ செல்ல வேண்டிய நிலை இருப்பதாக தெரிவிக்கப்படுகிறது.

🏢 கால விரயம், செலவு அதிகரிப்பு

திருப்போரூரில் மக்கள் தொகை, குடியிருப்புகள், தொழில் நிறுவனங்கள் மற்றும் வாகனங்களின் எண்ணிக்கை கணிசமாக உயர்ந்துள்ளதால், தனி மோட்டார் ஆய்வாளர் அலுவலகம் அமைப்பதற்கான அனைத்து தகுதிகளும் உள்ளதாக பொதுமக்கள் தெரிவிக்கின்றனர். இருப்பினும், அலுவலகம் அமைக்கப்படாததால், 35 கிலோமீட்டர் தொலைவில் உள்ள போக்குவரத்து அலுவலகங்களுக்கு செல்ல வேண்டிய சூழல் உருவாகி, போக்குவரத்து செலவு மற்றும் கால விரயம் ஏற்படுவதாக வாகன ஓட்டிகள் வேதனை தெரிவிக்கின்றனர்.

📢 அரசு நடவடிக்கை எடுக்க வேண்டும்

இந்தக் கோரிக்கையை வலியுறுத்தி பொதுமக்கள் மற்றும் அரசியல் கட்சியினர் பலமுறை மனுக்கள் அளித்தும், போராட்டங்கள் நடத்தியும் உள்ளனர். கடந்த ஆண்டு திருப்போரூர் பகுதி திருக்கழுக்குன்றம் மோட்டார் ஆய்வாளர் அலுவலகத்துடன் இணைக்கப்பட்டாலும், நிரந்தர தீர்வாக திருப்போரூரிலேயே தனி மோட்டார் ஆய்வாளர் யூனிட் அலுவலகம் அமைக்க தமிழக அரசு உடனடி நடவடிக்கை எடுக்க வேண்டும் என வாகன ஓட்டிகள் மற்றும் பொதுமக்கள் வலியுறுத்தியுள்ளனர்.