பரனூர் ரயில் தண்டவாளப் பகுதிகளில் கஞ்சா விற்பனை மற்றும் வழிப்பறி சம்பவங்கள் அதிகரித்துள்ளதாக பொதுமக்கள் புகார் தெரிவித்துள்ள நிலையில், காட்டாங்கொளத்தூரில் 1.650 கிலோ கஞ்சாவுடன் 3 மாணவர்களை போலீசார் கைது செய்துள்ளனர்.
📍செங்கல்பட்டு: பரனூர் ரயில்வே தண்டவாளங்களை ஒட்டியுள்ள பகுதிகளில் கஞ்சா விற்பனை, வழிப்பறி மற்றும் மொபைல் போன் பறிப்பு சம்பவங்கள் தொடர்ந்து அதிகரித்து வருவதாக பொதுமக்கள் குற்றம்சாட்டியுள்ளனர். குறிப்பாக, ரயில் படிக்கட்டில் அமர்ந்து பயணம் செய்யும் பயணிகளை தடிகளால் தாக்கி அவர்களிடம் இருந்த செல்போன்களை பறிக்கும் சம்பவங்கள் அடிக்கடி நடைபெறுவதாக கூறப்படுகிறது. இதனால் ரயில் பயணிகள் அச்சத்துடன் பயணம் செய்ய வேண்டிய நிலை ஏற்பட்டுள்ளதாகவும், ரயில்வே போலீசார் ரோந்து பணியை தீவிரப்படுத்த வேண்டும் என்றும் பொதுமக்கள் வலியுறுத்தியுள்ளனர்.
🚔 இதற்கிடையே, மறைமலைநகர் அருகே காட்டாங்கொளத்தூரில் விற்பனைக்காக கஞ்சா பதுக்கி வைத்திருந்ததாக தனியார் பல்கலைக்கழகத்தில் பயிலும் 3 மாணவர்களை போலீசார் கைது செய்தனர். அவர்களிடம் இருந்து மொத்தம் 1.650 கிலோ கஞ்சா பறிமுதல் செய்யப்பட்டது. கைது செய்யப்பட்ட மூவரும் கேரள மாநிலத்தைச் சேர்ந்தவர்கள் என போலீசார் தெரிவித்துள்ளனர்.
⚖️ இந்த வழக்கில் மூவரின் மீதும் என்டிபிஎஸ் (NDPS) சட்டத்தின் கீழ் தனித்தனியாக வழக்குகள் பதிவு செய்யப்பட்டுள்ளன. போதைப்பொருள் விற்பனை மற்றும் குற்றச்செயல்களை கட்டுப்படுத்த காவல்துறையினர் தீவிர நடவடிக்கைகளை மேற்கொண்டு வரும் நிலையில், ரயில் நிலையங்கள் மற்றும் தண்டவாளங்களை ஒட்டிய பகுதிகளில் பாதுகாப்பு மற்றும் ரோந்து பணியை மேலும் அதிகரிக்க வேண்டும் என்ற கோரிக்கை வலுத்துள்ளது.
