கரூரில் இந்து சமய அறநிலையத் துறைக்குச் சொந்தமான ரூ.25,000 கோடி மதிப்புடைய 3,085 ஏக்கர் நிலங்கள், முதலமைச்சர் ஜோசப் விஜய்க்கு வேண்டியவர்களுக்கு அவசர அவசரமாகப் பட்டா போட்டுக் கொடுக்கப்பட்டுள்ளதாகப் பாரதிய ஜனதா கட்சியின் மாநிலத் தலைவர் நயினார் நாகேந்திரன் மிகக் கடுமையான குற்றச்சாட்டை முன்வைத்துள்ளார். கோவை பீளமேட்டில் உள்ள பா.ஜ.க. மாவட்ட அலுவலகத்தில் இன்று செய்தியாளர்களைச் சந்தித்த அவர், தமிழக அரசின் இந்த அதிரடி முறைகேட்டைக் கண்டித்து அனல் பறக்கும் கருத்துக்களைப் பகிர்ந்துகொண்டார். கோவை மாவட்டத்தில் இன்று நடைபெற்ற விவசாயிகளின் கூட்டத்திலும், அதனைத் தொடர்ந்து கட்சி நிர்வாகிகளின் கூட்டத்திலும் பங்கேற்க வந்திருந்த அவர், செய்தியாளர்கள் சந்திப்பில் இந்த ஊழல் புகாரை அம்பலப்படுத்தினார்.

கரூர் பகுதியில் உள்ள நான்கு முக்கியக் கோவில்களுக்குச் சொந்தமான 3,085 ஏக்கர் நிலத்தை, 9-ஆம் தேதி காலையிலேயே மாவட்ட ஆட்சியரும், அறநிலையத் துறை இணை ஆணையரும் அவசர அவசரமாகப் பரிந்துரை செய்து, உடனடியாகத் தனியாருக்குப் பட்டா மாற்றிக் கொடுத்துள்ளனர். தமிழக முதலமைச்சர் ஜோசப் விஜய், இந்து கோவில்களின் நிலங்களை முழுமையாக அழிக்க வேண்டும் என்ற உள்நோக்கத்தோடுதான் இந்தச் செயலில் ஈடுபட்டுள்ளாரா? இதற்குத் துணைபோகும் வகையில் அறநிலையத் துறை அமைச்சர் ரமேஷ் செயல்படுகிறாரா? என்று கேள்வி எழுப்பிய நயினார் நாகேந்திரன், ஒரே நாளில் இவ்வளவு பெரிய நிலப்பரப்பைத் தாரைவார்க்க வேண்டிய அவசியம் என்ன வந்தது என்று சாடினார். இது தொடர்பாக பா.ஜ.க. சார்பில் முழுமையான ஆய்வு நடத்தப்பட்டு, அந்தப் புனிதமான கோவில் நிலங்களை மீட்கப் பா.ஜ.க. மிகப்பெரிய அளவில் போராட்டக் களத்தில் இறங்கும் என்றும் எச்சரித்தார்.

மேலும், கரூரில் கள்ளச்சாராய சம்பவத்தில் உயிரிழந்த 41 பேரின் வாரிசுகளுக்கு அரசுப் பணி நியமன ஆணை வழங்கப்பட்டதைச் சுட்டிக்காட்டிய அவர், “பணம் கொடுப்பது மட்டுமல்ல, தனக்கு வேண்டியவர்களுக்குச் சலுகை செய்வதும் ஒருவகை லஞ்சம்தான்; விஜய் கூட்டத்திற்கு வந்து இறந்தவர்களுக்கு மட்டும் உடனடியாக வேலை வழங்கியிருப்பது சுயநலமானது,” என்று விமர்சித்தார். மின்சாரம், போக்குவரத்து, வருவாய்த்துறை உள்ளிட்ட பல்வேறு துறைகளில் ஆயிரக்கணக்கான வாரிசுகள் வேலைக்காகக் காத்திருக்கும் நிலையில், குரூப் 1 தேர்வெழுதி முடித்தவர்களுக்கு முன்னுரிமை தராமல், சீனியாரிட்டி விதியை மீறி இந்த வேலைவாய்ப்பு வழங்கப்பட்டுள்ளதாகக் குற்றம் சாட்டினார். கரூரில் முதலமைச்சர் விஜய் பேசியதை அரசுப் பள்ளிகளில் ஒளிபரப்பிய விவகாரத்தைக் குறிப்பிட்ட நயினார் நாகேந்திரன், “எம்.ஜி.ஆர். தனது வாழ்வில் சொன்னதைச் செய்துகாட்டினார்; ஆனால், நடிகராக இருந்து முதலமைச்சரான ஜோசப் விஜய் ஒரு குறிப்பிட்ட சமுதாயத்தின் சொத்தைப் பறித்துக் கொடுக்கிறார். முதலமைச்சர் வரும்போது பள்ளிகளுக்கு விடுமுறை விடுவதும், அவரது காட்சிகளைப் பள்ளிகளில் திரையிடுவதும் மாணவர்களைத் தவறான வழிக்குக் கொண்டு செல்லும் செயல்; இதை பா.ஜ.க. வன்மையாகக் கண்டிக்கிறது” என்றார்.

மத்திய அரசின் சாதனைகளைக் குறிப்பிட்ட அவர், ₹4,500 மதிப்புள்ள யூரியாவை ₹300-க்கும், ₹4,000 மதிப்புள்ள டி.ஏ.பி. உரத்தை ₹1,500-க்கும் விவசாயிகளின் நலனுக்காக நஷ்டத்தைப் பொறுத்துக் கொண்டு மோடி அரசு வழங்கி வருவதாகக் கூறினார். ஆனால், இந்த உரங்களைத் திரவ வடிவில் மாற்றிச் சிலர் கேரளாவுக்குக் கடத்துவதாகப் புகார்கள் வந்துள்ளதாகவும், அது குறித்து விசாரித்து வருவதாகவும் தெரிவித்தார். இறுதியாக, விசிக தலைவர் திருமாவளவன் குறித்துப் பேசிய அவர், “மதிப்பிற்குரிய திருமாவளவன் தனது நிலைப்பாடுகளைத் தொடர்ந்து மாற்றிக் கொண்டே இருக்கிறார்; தி.மு.க. கூட்டணியில் இருந்தவர், தற்போது த.வெ.க. (தமிழக வெற்றிக் கழகம்) நோக்கிச் சென்றவுடன் பேச்சு மாறியுள்ளது. எப்படியாவது 2029 தேர்தலில் பா.ஜ.க.வை எதிர்க்க வேண்டும் என்று அனைவரும் ஓரணியில் திரளப் பார்க்கிறார்கள்; இதன் மூலம் பா.ஜ.க.வைக் கண்டு அவர்கள் பயப்படுவது தெளிவாகத் தெரிகிறது,” என்று நயினார் நாகேந்திரன் தனது பேட்டியில் கூறினார்.