கிளாம்பாக்கம் பேருந்து நிலையத்தில் புதுமண பெண்ணிடம் மது போதையில் ஆபாசமாக பேசி தொந்தரவு செய்த இளைஞரை போலீசார் கைது செய்து சிறையில் அடைத்தனர்.

🚌 பேருந்து பயணத்தில் தொடங்கிய தொல்லை

போரூர் அடுத்த மணப்பாக்கம் பகுதியைச் சேர்ந்த புதுமண தம்பதியான சுபஸ்ரீ (21) மற்றும் ரவிபிரகாஷ் (22), நேற்று முன்தினம் இரவு தங்களது சொந்த ஊருக்கு செல்வதற்காக போரூரிலிருந்து மாநகர பேருந்தில் கிளாம்பாக்கம் பேருந்து நிலையம் வந்தனர். அதே பேருந்தில் பயணம் செய்த கடலூர் மாவட்டம், பண்ருட்டியைச் சேர்ந்த பாலா (23), மது போதையில் இருந்ததாக கூறப்படுகிறது. பயணத்தின் போது சுபஸ்ரீயிடம் ஆபாசமாக பேசி, கேலி, கிண்டல் செய்துள்ளார். பேருந்து கிளாம்பாக்கம் வந்த பிறகும் அவர் தனது செயல்களை நிறுத்தாமல், தம்பதியரை பின்தொடர்ந்து வெளியூர் பேருந்துகள் நிறுத்தம் நோக்கி சென்றதாக கூறப்படுகிறது.

⚠️ தட்டிக்கேட்ட கணவருடன் கைகலப்பு

பாலா தொடர்ந்து புதுமண பெண்ணிடம் வம்பிழுத்ததால், ஆத்திரமடைந்த சுபஸ்ரீ மற்றும் அவரது கணவர் ரவிபிரகாஷ் இதுகுறித்து தட்டிக்கேட்டார். இதனால் இருவருக்கும் இடையே வாக்குவாதம் ஏற்பட்டு, பின்னர் கைகலப்பாக மாறியது. சம்பவம் அப்பகுதியில் சிறிது நேரம் பரபரப்பை ஏற்படுத்தியது. அங்கிருந்தவர்கள் தலையிட்டு இருவரையும் பிரித்ததாக கூறப்படுகிறது.

👮 போலீஸ் நடவடிக்கை; நீதிமன்றத்தில் ஆஜர்

சம்பவம் தொடர்பாக சுபஸ்ரீ கிளாம்பாக்கம் காவல் நிலையத்தில் புகார் அளித்தார். அதன் பேரில் போலீசார் வழக்குப்பதிவு செய்து பாலாவை கைது செய்தனர். பின்னர் அவரை செங்கல்பட்டு நீதிமன்றத்தில் ஆஜர்படுத்தி, நீதிமன்ற உத்தரவின் பேரில் கிளை சிறையில் அடைத்தனர். பெண்களிடம் பொது இடங்களில் அத்துமீறி நடந்து கொள்பவர்கள் மீது கடுமையான நடவடிக்கை தொடரும் என போலீசார் தெரிவித்துள்ளனர்.