காவிரி நதிநீர் பங்கீடு மற்றும் மேகதாது அணை விவகாரம் தொடர்பாகத் தலைநகர் பெங்களூரில் ஆகஸ்ட் 3-ஆம் தேதி நடைபெறவுள்ள உயர்மட்டப் பேச்சுவார்த்தையில் நேரில் கலந்து கொள்ளுமாறு தமிழக முதலமைச்சர்  விஜய் கர்நாடக முதலமைச்சர் டி.கே. சிவக்குமார் அதிகாரப்பூர்வ அழைப்புக் கடிதம் அனுப்பியுள்ளார்.

காவிரி ஆற்றின் குறுக்கே மேகதாது என்ற இடத்தில் புதிய சமநிலை நீர்த்தேக்கம் கட்டுவதற்குக் கர்நாடக அரசு தீவிர நடவடிக்கை எடுத்து வரும் நிலையில், அதற்குத் தமிழக அரசு மற்றும் அனைத்துக் கட்சிகளும் மிகக் கடுமையான எதிர்ப்பைப் பதிவு செய்து வருகின்றன. உச்ச நீதிமன்றத்தின் இறுதித் தீர்ப்பையும், காவிரி மேலாண்மை ஆணையத்தின் வழிகாட்டுதல்களையும் மீறி மேகதாதுவில் கர்நாடகா புதிய திட்டங்களைத் தொடங்கக் கூடாது எனத் தமிழக முதலமைச்சர் விஜய் அவர்கள் அண்மையில் பிரதமர் நரேந்திர மோடிக்கும் கடிதம் எழுதியிருந்தார். மேலும், மேகதாது விவகாரத்தில் அடுத்தகட்டச் சட்ட நடவடிக்கைகளைத் தீவிரப்படுத்துவது குறித்துத் தமிழகச் சட்ட வல்லுநர்களுடன் முதலமைச்சர் விஜய் உயர்மட்ட ஆலோசனையும் நடத்தியிருந்தார்.

இந்நிலையில்தான், இரு மாநில எல்லைப் பிரச்சனை மற்றும் நீர் பங்கீடு சார்ந்த சர்ச்சைகளுக்கு இருதரப்புப் பேச்சுவார்த்தை மூலம் சுமுகத் தீர்வு காண்பதற்காகக் கர்நாடக முதலமைச்சர் டி.கே. சிவக்குமார் புதிய முயற்சி ஒன்றை மேற்கொண்டுள்ளார். தமிழக முதலமைச்சர் விஜய்க்கு அவர் எழுதியுள்ள அந்த அழைப்புக் கடிதத்தில், “காவிரி நதிநீர் பங்கீடு மற்றும் மேகதாது திட்டம் சார்ந்த இரு மாநிலங்களின் கருத்தொற்றுமை குறித்து விரிவாக ஆலோசிக்க வரும் ஆகஸ்ட் 3-ஆம் தேதி பெங்களூருவில் உள்ள மாநிலச் தலைமைச் செயலகத்திற்கு வருகை தருமாறு அன்போடு அழைக்கிறேன்.

இக்கூட்டத்தில் இரு மாநிலங்களின் நீர்வளத் துறை அதிகாரிகளும் சட்ட வல்லுநர்களும் பங்கேற்றுச் சிக்கல்களுக்கு சுமுகத் தீர்வு காண முயலலாம்” எனக் குறிப்பிட்டுள்ளதாகத் தகவல்கள் வெளியாகியுள்ளன. மேகதாது விவகாரத்தில் தமிழக அரசு தனது உறுதியான சட்டப்பூர்வ எதிர்ப்பைத் தெரிவித்து வரும் சூழலில், கர்நாடக முதலமைச்சரின் இந்த அழைப்பை ஏற்று முதலமைச்சர் விஜய் பெங்களூரு செல்வாரா என்பது அரசியல் களத்தில் பெரும் எதிர்பார்ப்பை ஏற்படுத்தியுள்ளது.