செய்யூர் அருகே ஜமீன்புதூர் கிராமத்தில் இரவு நேரங்களில் கோணி பைகளுடன் சுற்றித் திரிந்த மர்ம நபர்களால் பொதுமக்கள் அச்சமடைந்துள்ளனர்.

🚨 கோணி பைகளுடன் சுற்றிய மர்ம நபர்கள்

செங்கல்பட்டு மாவட்டம், செய்யூர் அருகே ஜமீன்புதூர் கிராமத்தில் 300-க்கும் மேற்பட்ட குடும்பத்தினர் வசித்து வருகின்றனர். இந்நிலையில், இரவு நேரங்களில் சில மர்ம நபர்கள் கைகளில் கோணி பைகளுடன் கிராமத்தில் சுற்றித் திரிந்ததாக கூறப்படுகிறது. இதைக் கண்ட இளைஞர்கள் அவர்களை விரட்டியடித்த சம்பவம் பரபரப்பை ஏற்படுத்தியுள்ளது.

🔦 வீடுகளை நோட்டமிட்டதாக புகார்

இரண்டு நாட்களுக்கு முன்பும் மர்ம நபர்கள் வீடுகளின் மீது டார்ச் லைட் அடித்து நோட்டமிட்டதாக பொதுமக்கள் தெரிவித்துள்ளனர். இதனால் திருட்டு சம்பவங்கள் நடைபெறக்கூடும் என்ற அச்சத்தில் அப்பகுதி மக்கள் இரவு நேரங்களில் கண்காணிப்பை தீவிரப்படுத்தியுள்ளனர்.

👮 சிசிடிவி ஆய்வு… போலீசார் விசாரணை

புகாரின் பேரில் செய்யூர் போலீசார் அப்பகுதியில் உள்ள சிசிடிவி கேமரா காட்சிகளை ஆய்வு செய்தனர். அதில் 5 பேர் கொண்ட கும்பல் கோணி பைகளுடன் சுற்றித் திரிந்தது தெரியவந்துள்ளது. மர்ம நபர்கள் யார், அவர்களின் நோக்கம் என்ன என்பது குறித்து போலீசார் தொடர்ந்து விசாரணை நடத்தி வருகின்றனர்.