சர்வதேச அளவில் மிக உயரிய மற்றும் அதிகாரம் மிக்க அமைப்பான ஐக்கிய நாடுகள் சபையின் பாதுகாப்பு கவுன்சிலில் (UNSC), வரும் 2028-29ஆம் ஆண்டுக்கான தற்காலிக உறுப்பினர் பதவியைப் பிடிப்பதற்கான இந்தியாவின் அதிகாரப்பூர்வத் தேர்தல் பிரசாரத்தை இந்திய வெளியுறவுத்துறை அமைச்சர் எஸ். ஜெய்சங்கர் நியூயார்க்கில் உள்ள ஐ.நா தலைமையகத்தில் முறைப்படி தொடங்கி வைத்தார். உலகளாவிய அமைதி மற்றும் வளர்ச்சியை மையமாகக் கொண்டு வடிவமைக்கப்பட்டுள்ள இந்தியாவின் இந்தத் தேர்தல் பிரசாரத்திற்கு ‘சாந்தி’ (SHANTI) எனப் பெயரிடப்பட்டுள்ளது தற்பொழுது உலக நாடுகளின் கவனத்தை ஈர்த்துள்ளது.
ஐ.நா. தூதர்கள், சர்வதேச அதிகாரிகள் மற்றும் பல்வேறு நாடுகளின் பிரதிநிதிகள் பங்கேற்ற இந்த பிரம்மாண்ட மாநாட்டில் உரையாற்றிய அமைச்சர் ஜெய்சங்கர், இந்தியாவின் இந்த இரு ஆண்டுகால உறுப்பினர் பதவிக் காலத்திற்கான அணுகுமுறையானது முற்றிலும் ‘சாந்தி’ கோட்பாட்டின் அடிப்படையிலேயே அமைந்திருக்கும் என்று உறுதியளித்தார். ‘SHANTI’ என்பதன் விரிவாக்கம் “விதிகள், நம்பிக்கை மற்றும் நேர்மை ஆகியவற்றின் மூலம் ஒட்டுமொத்த வளர்ச்சியை உறுதி செய்தல்” (Securing Holistic Advancement through Norms, Trust, and Integrity) என்பதாகும். தற்போதைய உலகச் சூழலில் பல்வேறு பிராந்தியங்களில் போர்களும், அரசியல் ஸ்திரமற்ற தன்மைகளும் நிலவி வரும் வேளையில், சர்வதேசச் சவால்களை எதிர்கொள்ளவும், தெற்குலக நாடுகளின் (Global South) குரலை உலக அரங்கில் வலுவாக ஒலிக்கச் செய்யவும் இந்தியா இந்தத் தேர்தலில் போட்டியிடுவதாக அவர் தீர்க்கமாகக் குறிப்பிட்டார்.
பாதுகாப்பு கவுன்சிலில் உள்ள ஆசிய-பசிபிக் பிராந்தியத்திற்கான ஒரே ஒரு தற்காலிக உறுப்பினர் இடத்திற்கு, வரும் ஜூன் 2027-ல் மெகா தேர்தல் நடைபெறவுள்ளது. இந்த ஒரே ஒரு இடத்திற்காக இந்தியாவும், தஜிகிஸ்தான் நாடும் நேரடியாகக் களம் காணவுள்ளதால் இந்தத் தேர்தல் சர்வதேச அளவில் பெரும் எதிர்பார்ப்பை ஏற்படுத்தியுள்ளது. ஏற்கனவே கடந்த 2021-22ஆம் ஆண்டு உட்பட மொத்தம் 8 முறை ஐ.நா. பாதுகாப்பு கவுன்சிலின் தற்காலிக உறுப்பினராக இந்தியா அமர்ந்து சர்வதேச விவகாரங்களை வழிநடத்தியுள்ளது குறிப்பிடத்தக்கது. தற்போது தஜிகிஸ்தான் அணிக்கு 57 இஸ்லாமிய நாடுகளைக் கொண்ட ஓ.ஐ.சி (OIC) கூட்டமைப்பு ஆதரவு அளித்து வரும் நிலையில், இந்தியாவின் இந்த ‘சாந்தி’ உத்தியின் மூலமாகப் பெரும்பான்மை நாடுகளின் வாக்குகளைப் பெற்று இந்தியா வரலாற்று வெற்றியைப் பதிவு செய்யும் என இந்திய வெளியுறவு வட்டாரங்கள் மிகுந்த நம்பிக்கையுடன் தெரிவித்துள்ளன.
