இந்திய தபால் துறை (India Post) தனது நீண்டகால வரலாற்றில் இதுவரை இல்லாத அளவிற்கு, நடப்பு 2026-27 நிதியாண்டின் முதல் காலாண்டில் (Q1) சுமார் 4,008.95 கோடி ரூபாய் வர்த்தகத்தை ஈட்டி வரலாற்றுச் சிறப்புமிக்க இமாலய இலக்கை அடைந்துள்ளது. இது, முந்தைய நிதியாண்டின் முதல் காலாண்டு வர்த்தகத்துடன் ஒப்பிடுகையில் 22.2 சதவீதம் கூடுதல் வளர்ச்சி என்று மத்திய தகவல் தொடர்புத் துறை அமைச்சர் ஜோதிராதித்யா சிந்தியா அதிகாரப்பூர்வமாகத் தெரிவித்துள்ளார்.
தபால் துறையின் 2026-27 நிதியாண்டிற்கான முதல் காலாண்டு வருடாந்திர வணிகத் திட்டத்தின் (Annual Business Plan) உயர்மட்ட ஆய்வுக் கூட்டத்திற்குப் பிறகு செய்தியாளர்களைச் சந்தித்த மத்திய அமைச்சர் ஜோதிராதித்யா சிந்தியா இந்த முக்கியத் தரவுகளை வெளியிட்டார். தபால் துறையின் வரலாற்றில் ஒரு காலாண்டில் 4,000 கோடி ரூபாய் என்ற மைல்கல்லைக் கடப்பது இதுவே முதன்முறை என்று குறிப்பிட்ட அவர், கடந்த காலங்களில் தபால் துறையின் வருடாந்திர வளர்ச்சி விகிதம் வெறும் 1 முதல் 2.5 சதவீதமாக மட்டுமே இருந்த நிலையில், தற்பொழுது இந்த அசுர வளர்ச்சி சாத்தியமாகியுள்ளது என்று பெருமிதம் தெரிவித்தார்.
இந்த இமாலய சாதனைக்குத் தபால் துறையின் கீழ் செயல்படும் பார்சல் (Parcel) மற்றும் மெயில் (Mail) பிரிவுகளின் அதிரடி வளர்ச்சியே முக்கியக் காரணம் என்று அமைச்சர் விளக்கமளித்தார். குறிப்பாக, பார்சல் சேவைகளின் மூலமான வருவாய் கடந்த ஆண்டின் முதல் காலாண்டில் 197 கோடி ரூபாயாக இருந்த நிலையில், இந்த ஆண்டு 50 சதவீத அசுர வளர்ச்சியுடன் 296 கோடி ரூபாயாக உயர்ந்துள்ளது. அதேபோல், மெயில் பிரிவின் வருவாய் 42 சதவீதம் அதிகரித்து 552 கோடி ரூபாயிலிருந்து 783 கோடி ரூபாயாக எகிறியுள்ளது. ஈ-காமர்ஸ் நிறுவனங்களான பிளிப்கார்ட், ஷிப்ராக்கெட் போன்றவற்றுடன் மேற்கொள்ளப்பட்ட நவீன வணிகக் கூட்டணிகள் மற்றும் கிராமப்புறங்களில் நிதிச் சேவைகளைத் தீவிரமாக விரிவுபடுத்தியது போன்ற திட்டமிட்ட அதிரடி நகர்வுகளால் இந்த வருவாய் சாத்தியமாகியுள்ளது. ஒட்டுமொத்த தபால் வட்டங்களில் ஆந்திரப் பிரதேசம், சத்தீஸ்கர் மற்றும் மேற்கு வங்கம் ஆகிய மாநிலங்கள் மிகச்சிறந்த செயல்பாட்டைப் பதிவு செய்து முதலிடங்களைப் பிடித்துள்ளதாகவும், வரும் 2029-30 நிதியாண்டுக்குள் இந்திய தபால் துறையை முழுமையான லாபம் ஈட்டும் மையமாக மாற்றுவதே மத்திய அரசின் இலக்கு என்றும் ஜோதிராதித்யா சிந்தியா தனது பேட்டியில் தீர்க்கமாகக் குறிப்பிட்டார்.
