உடலில் குறை இருந்தாலும் உள்ளத்தில் அசாத்திய உறுதி இருந்தால் உலகத்தையே வெல்ல முடியும் என்பதைத் தனது நெஞ்சாரும் வாழ்க்கைப் பயணத்தின் மூலம் நிரூபித்துக் காட்டி வருகிறார் சென்னையைச் சேர்ந்த மாற்றுத்திறனாளி தமீம் அன்சாரி. ஒரே ஒரு கையால் சைக்கிளை இயக்கி, இதுவரை 67 ஆயிரம் கிலோ மீட்டருக்கும் மேல் இந்திய தேசத்தின் பல்வேறு எல்லைகளுக்குப் பயணம் மேற்கொண்டு, தற்பொழுது ஒட்டுமொத்தப் பொதுமக்களுக்கும் அசைக்க முடியாத நம்பிக்கையின் அடையாளமாகத் திகழ்ந்து வருகிறார்.

கடந்த கொரோனா பெருந்தொற்று காலத்தின் போது, லாக்டவுன் கட்டுப்பாடுகளால் வருமானமின்றித் தவித்த தனது குடும்பப் பொருளாதாரத்திற்கு எப்படியாவது உதவ வேண்டும் என்ற கட்டாயத்தில் முதன்முதலாகத் தனது சைக்கிள் பயணத்தைத் தொடங்கினார் தமீம் அன்சாரி. ஆரம்பத்தில் வாழ்வாதாரத்திற்காகத் தொடங்கிய அந்த எளிய பயணம், நாளடைவில் சமூக விழிப்புணர்வுப் பயணமாகப் பரிணாம வளர்ச்சி பெற்று, இன்று இந்தியாவின் சாதனைகளின் வரலாற்றப் பக்கங்களில் தடம் பதித்துள்ளது. பனி கொட்டும் காஷ்மீரின் அமைதியான பள்ளத்தாக்குகளிலிருந்து, அலையடிக்கும் கன்னியாகுமரியின் தென்கோடி முனை வரை தனது ஒற்றைக் கையால் சைக்கிளை மிதித்துச் சென்று, இயற்கை வளங்கள் பாதுகாப்பு மற்றும் சுற்றுச்சூழல் விழிப்புணர்வை மக்களிடம் கொண்டு சேர்த்துள்ளார்.

தனது அடுத்தகட்டப் லட்சியப் பயணம் குறித்துப் பேசிய தமீம் அன்சாரி, இயற்கை வளங்கள் மற்றும் சுற்றுச்சூழல் பாதுகாப்பு குறித்த விழிப்புணர்வை உலக அரங்கிற்கு எடுத்துச் செல்லும் உன்னத நோக்கில், அடுத்த மாதம் இந்தியாவில் இருந்து லண்டன் வரை பிரம்மாண்ட சைக்கிள் பயணம் மேற்கொள்ளத் திட்டமிட்டுள்ளதாக அதிரடியாகத் தெரிவித்துள்ளார். இந்த சர்வதேசப் பயணத்திற்கான மிகக் கடுமையான இறுதிப் பயிற்சியாக, தற்பொழுது நாள்தோறும் அதிகாலையிலேயே சென்னையிலிருந்து திண்டிவனம் வரை சைக்கிளில் சென்று, மீண்டும் சென்னைக்கே திரும்பி வந்து தனது அசாத்திய உடல் மற்றும் மன வலிமையை மெருகேற்றி வருகிறார். எத்தனையோ சவால்கள், இயற்கை இடர்பாடுகள் மற்றும் உடல் உபாதைகளைக் கடந்து, லட்சக்கணக்கான மக்களின் இதயங்களில் தன்னம்பிக்கை விதைகளை விதைத்து வரும் தமீம் அன்சாரி, மாற்றுத்திறன் என்பது சாதனைக்கு ஒருபோதும் தடையல்ல என்பதை உலகிற்கு உணர்த்தி உத்வேகத்தின் கலங்கரை விளக்கமாக மிளிர்கிறார்.