செய்யூரில் 800 ஏக்கர் பரப்பளவில் தொழில் பூங்கா அமைக்கும் திட்டம் கிடப்பில் போடப்பட்டுள்ளதாக குற்றம்சாட்டியுள்ள பொதுமக்கள், இளைஞர்களுக்கு வேலைவாய்ப்பு உருவாக்கும் வகையில் பணிகளை உடனடியாக தொடங்க வேண்டும் என அரசிடம் கோரிக்கை விடுத்துள்ளனர்.

🏭 தொழில் வளர்ச்சியில் பின்தங்கிய செய்யூர்

செங்கல்பட்டு மாவட்டத்தில் செங்கல்பட்டு, தாம்பரம், பல்லாவரம், திருப்போரூர், சோழிங்கநல்லூர் உள்ளிட்ட பகுதிகள் தொழில் வளர்ச்சியில் முன்னிலை வகிக்கின்றன. ஆனால் மதுராந்தகம் மற்றும் செய்யூர் தொகுதிகள் இன்னும் தொழில் வளர்ச்சியில் பின்தங்கியுள்ளது  செய்யூர் தொகுதியில் சுமார் 2.5 லட்சம் மக்கள் வசித்து வரும் நிலையில், பெரும்பாலானோர் விவசாயத்தை நம்பியோ அல்லது சென்னை மற்றும் அதன் புறநகர் தொழிற்சாலைகளுக்கு நீண்ட தூரம் பயணம் செய்தோ வேலை செய்து வருகின்றனர். இதனால் இளைஞர்கள் மற்றும் பெண்கள் உடல், மன ரீதியான சிரமங்களை எதிர்கொள்வதாக பொதுமக்கள் தெரிவிக்கின்றனர்.

🚜 800 ஏக்கர் தொழில் பூங்கா திட்டம் கிடப்பில்

செய்யூர் உப்பளம் பகுதியை ஒட்டி 2,000 ஏக்கர் பரப்பில் அனல்மின் நிலையம் அமைக்க நிலங்கள் கையகப்படுத்தப்பட்ட நிலையில், பின்னர் அந்தத் திட்டம் முன்னேறவில்லை. தொடர்ந்து கடந்த ஆண்டு தமிழக அரசு 800 ஏக்கர் பரப்பளவில் தொழில் பூங்கா அமைக்கப்படும் என அறிவித்ததை அடுத்து, நிலம் கையகப்படுத்துதல் மற்றும் ஆய்வுப் பணிகள் தொடங்கப்பட்டன. ஆனால் தற்போது அந்தத் திட்டப் பணிகள் முன்னேற்றமின்றி கிடப்பில் உள்ளதாக அப்பகுதி மக்கள் குற்றம்சாட்டுகின்றனர்.

💼 வேலைவாய்ப்புக்காக திட்டத்தை விரைவுபடுத்த கோரிக்கை

செய்யூரில் தொழில் பூங்கா அமைந்தால் ஆயிரக்கணக்கான இளைஞர்களுக்கு உள்ளூரிலேயே வேலைவாய்ப்பு கிடைக்கும் என்றும், பொருளாதார வளர்ச்சிக்கும் இது பெரும் ஊக்கமாக இருக்கும் என்றும் பொதுமக்கள் நம்பிக்கை தெரிவிக்கின்றனர். எனவே, தாமதமின்றி திட்டப் பணிகளை மீண்டும் தொடங்கி, தொழிற்சாலைகள் அமைக்க தேவையான நடவடிக்கைகளை அரசு விரைந்து மேற்கொள்ள வேண்டும் என்று அவர்கள் வலியுறுத்தியுள்ளனர்.