செங்கல்பட்டு மாவட்ட குவாரி மற்றும் கிரஷர்களிலிருந்து செல்லும் வாகனங்கள் அனுமதிக்கப்பட்ட அளவை மீறி கனிமங்களை ஏற்றிச் சென்றால் கடும் நடவடிக்கை எடுக்கப்படும் என கலெக்டர் வீரப்பன் எச்சரித்துள்ளார்.

🚛 குவாரி வாகனங்களுக்கு புதிய கட்டுப்பாடுகள்

செங்கல்பட்டு மாவட்டத்தில் செயல்பட்டு வரும் கல்குவாரி மற்றும் கிரஷர் உரிமையாளர்களுக்கு மாவட்ட கலெக்டர் வீரப்பன் பல்வேறு கட்டுப்பாடுகள் மற்றும் நிபந்தனைகளை விதித்துள்ளார். சாலை பாதுகாப்பு, சட்டவிரோத கனிமக் கடத்தலை தடுக்கவும், பொதுமக்களின் பாதுகாப்பை உறுதி செய்யவும் இந்த நடவடிக்கைகள் மேற்கொள்ளப்பட்டுள்ளன. குறிப்பாக குவாரிகளில் இருந்து கனிமங்களை ஏற்றிச் செல்லும் அனைத்து வாகனங்களும் அனுமதிக்கப்பட்ட கொள்ளளவுக்கு மட்டுமே சரக்குகளை ஏற்றிச் செல்ல வேண்டும் என்றும், விதிமீறல்கள் கண்டறியப்பட்டால் கடுமையான நடவடிக்கை எடுக்கப்படும் என்றும் எச்சரிக்கப்பட்டுள்ளது.

⚖️ டிஜிட்டல் எடைமேடை, ஜிபிஎஸ் கட்டாயம்

கல்குவாரி குத்தகைதாரர்கள் மற்றும் கல் அரவை ஆலை உரிமையாளர்கள் தங்கள் வளாகங்களில் டிஜிட்டல் எடைமேடைகளை கட்டாயம் நிறுவி, அவற்றை மிமாஸ் (MIMAS) இணையதளத்துடன் இணைக்க வேண்டும் என உத்தரவிடப்பட்டுள்ளது. மேலும் கனிமங்களை ஏற்றிச் செல்லும் அனைத்து வாகனங்களிலும் ஜி.பி.எஸ். கருவி பொருத்தப்பட வேண்டும். ஒவ்வொரு வாகனத்திலும் கனிமங்களுக்கு உரிய நடைச்சீட்டு (Transit Pass) கட்டாயமாக இருக்க வேண்டும் என்றும் அறிவுறுத்தப்பட்டுள்ளது. கிராமப்புற சாலைகளில் கனரக வாகனங்கள் செல்லும் போது புழுதி பறக்காமல் இருக்க தண்ணீர் தெளிக்கும் நடவடிக்கைகளையும் குவாரி நிர்வாகங்கள் மேற்கொள்ள வேண்டும் என உத்தரவிடப்பட்டுள்ளது.

🚨 விதிமீறினால் உரிமம் ரத்து

அனுமதிக்கப்பட்ட அளவை விட அதிகமாக கனிமங்களை ஏற்றி சட்டவிரோதமாக கொண்டு செல்லும் வாகனங்கள் மீது கடுமையான நடவடிக்கை எடுக்கப்படும் என கலெக்டர் வீரப்பன் எச்சரித்துள்ளார். இதுபோன்ற விதிமீறல்களில் ஈடுபடும் குவாரிகளின் உரிமங்கள் ரத்து செய்யப்படுவதுடன், சம்பந்தப்பட்ட குவாரி உரிமையாளர்கள், கிரஷர் உரிமையாளர்கள், வாகன உரிமையாளர்கள் மற்றும் ஓட்டுநர்கள் மீதும் சட்டரீதியான நடவடிக்கை மேற்கொள்ளப்படும். இந்த உத்தரவுகளை முறையாக பின்பற்றி, சாலை பாதுகாப்பு மற்றும் சுற்றுச்சூழல் பாதுகாப்பில் ஒத்துழைக்குமாறு மாவட்ட நிர்வாகம் அனைத்து குவாரி மற்றும் கிரஷர் உரிமையாளர்களையும் கேட்டுக்கொண்டுள்ளது.