செங்கல்பட்டு அரசு சிறப்பு இல்லம் மற்றும் பாதுகாப்பு இடங்களில் தொடர்ந்து ஏற்பட்ட மோதல்களைத் தொடர்ந்து குழந்தைகள் நலன் மற்றும் சிறப்பு சேவைகள் துறை இயக்குநர் திடீர் ஆய்வு மேற்கொண்டார்.

🏛️ தொடர் மோதலால் அரசு சிறப்பு இல்லங்களில் திடீர் ஆய்வு

செங்கல்பட்டு மாவட்டத்தில் சமூக நலத்துறையின் கட்டுப்பாட்டில் செயல்பட்டு வரும் அரசினர் சிறப்பு இல்லம் மற்றும் அரசினர் பாதுகாப்பு இடம் ஆகியவற்றில் தொடர்ந்து ஏற்பட்ட மோதல் சம்பவங்களின் எதிரொலியாக, குழந்தைகள் நலன் மற்றும் சிறப்பு சேவைகள் துறை இயக்குநர் சுப்புலட்சுமி திடீர் ஆய்வு மேற்கொண்டார். இந்த இல்லங்களில் தமிழகம் முழுவதும் இருந்து பல்வேறு குற்ற வழக்குகளில் தொடர்புடைய சிறார்கள் நீதிமன்ற உத்தரவின் பேரில் தங்க வைக்கப்பட்டுள்ளனர்.

⚠️ அடுத்தடுத்து நடந்த மோதல்கள்

தற்போது செங்கல்பட்டு அரசினர் சிறப்பு இல்லத்தில் 18 வயதிற்குட்பட்ட 35-க்கும் மேற்பட்ட சிறுவர்களும், ஆத்தூர் அரசினர் பாதுகாப்பு இடத்தில் 18 முதல் 21 வயதுக்குட்பட்ட 50-க்கும் மேற்பட்ட இளைஞர்களும் தங்கியுள்ளனர். கடந்த 11-ஆம் தேதி பாதுகாப்பு இடத்தில் சிலர் ஆசிரியர்கள் மற்றும் காவலாளிகளை தாக்கியதுடன், சாலையில் சென்ற இருசக்கர வாகன ஓட்டிகளையும் தாக்கி, மூன்று மோட்டார் சைக்கிள்கள், ஐந்து செல்போன்கள் மற்றும் பணத்தை பறித்துச் சென்றதாக கூறப்படுகிறது. தொடர்ந்து 16-ஆம் தேதி சிறப்பு இல்லத்தில் ஒரு சிறுவரை 10-க்கும் மேற்பட்டோர் தாக்கியதில் அவர் பலத்த காயமடைந்து, தலையில் 22 தையல்கள் போடப்பட்டதாக தகவல் வெளியாகியது. மேலும், அண்மையில் மீண்டும் சிறுவர்களுக்கிடையே ஏற்பட்ட தகராறில், இல்லத்திற்குள் இருந்த சில பொருட்கள் சேதப்படுத்தப்பட்டதாகவும் கூறப்படுகிறது.

👥 சிறார்களிடம் நேரில் பேச்சுவார்த்தை

இந்த தொடர் சம்பவங்களைத் தொடர்ந்து குழந்தைகள் நலன் மற்றும் சிறப்பு சேவைகள் துறை இயக்குநர் சுப்புலட்சுமி, அரசு சிறப்பு இல்லம் மற்றும் பாதுகாப்பு இடங்களுக்கு நேரில் சென்று சுமார் ஒரு மணி நேரம் ஆய்வு மேற்கொண்டார். அப்போது சிறார்களுடன் நேரடியாக கலந்துரையாடி, அவர்கள் எதிர்கொள்ளும் பிரச்சினைகள் மற்றும் அதிகாரிகள் தரப்பிலான சவால்கள் குறித்து கேட்டறிந்தார். மேலும், இல்லங்களின் பாதுகாப்பு, நிர்வாகம் மற்றும் சிறார்களின் நலன் தொடர்பான அம்சங்களையும் ஆய்வு செய்ததாக கூறப்படுகிறது. ஆய்வை முடித்த பின்னர், தேவையான நடவடிக்கைகள் குறித்து அதிகாரிகளுக்கு அறிவுறுத்தி அவர் அங்கிருந்து புறப்பட்டுச் சென்றார்.