செங்கல்பட்டு புறவழிச்சாலையில் அரசு பேருந்து ஓடுநர்கள் பயணிகளை மேம்பாலத்திலேயே இறக்கிவிட்டு செல்வதால் பாதுகாப்பு கேள்விக்குறியாக உள்ளதாக சமூக ஆர்வலர்கள் குற்றம் சாட்டி உள்ளனர்.
🚍 மேம்பாலத்தில் இறக்கப்படும் பயணிகள்
செங்கல்பட்டு மாவட்டத்தின் மகேந்திரா வேர்ல்டு சிட்டி, மறைமலைநகர், ஒரகடம் உள்ளிட்ட தொழிற்பகுதிகளில் பணிபுரியும் ஆயிரக்கணக்கானோர் வார இறுதி மற்றும் பண்டிகை நாட்களில் அரசு பேருந்துகள் மூலம் சொந்த ஊர்களுக்கு பயணம் செய்கின்றனர். மேலும், காஞ்சிபுரம், திருக்கழுக்குன்றம் மற்றும் மாமல்லபுரம் பகுதிகளுக்கு வரும் பக்தர்கள் மற்றும் சுற்றுலா பயணிகளும் இந்த வழித்தடத்தை அதிகம் பயன்படுத்துகின்றனர். பயணிகளின் வசதிக்காக புறவழிச்சாலை மேம்பாலத்தின் கீழ் பேருந்துகள் நின்று செல்ல ஏற்பாடு செய்யப்பட்டிருந்தாலும், சென்னை நோக்கி வரும் பல அரசு பேருந்துகள் மேம்பாலத்தின் மேலேயே பயணிகளை இறக்கிவிட்டு செல்வதாக புகார் எழுந்துள்ளது.
⚠️ பாதுகாப்புக்கு பெரும் அச்சுறுத்தல்
மேம்பாலத்தின் மீது இறக்கப்படும் பயணிகள், குறிப்பாக முதியவர்கள், பெண்கள் மற்றும் குழந்தைகள் நீண்ட தூரம் நடந்து செல்ல வேண்டிய கட்டாயத்தில் உள்ளனர். வேகமாக செல்லும் வாகனங்களுக்கு இடையே நடந்து செல்லும் நிலை உருவாகுவதால் விபத்து அபாயம் அதிகரித்துள்ளதாக பொதுமக்கள் கவலை தெரிவிக்கின்றனர். இதனால் பயணிகள் மட்டுமல்லாமல், மற்ற வாகன ஓட்டிகளும் எதிர்பாராத விபத்துகளில் சிக்கும் அபாயம் இருப்பதாக சமூக ஆர்வலர்கள் எச்சரிக்கின்றனர்.
🏛️ அதிகாரிகள் உடனடி நடவடிக்கை எடுக்க வேண்டும்
புறவழிச்சாலை மேம்பாலத்தின் கீழ் பேருந்துகள் கட்டாயம் நின்று பயணிகளை ஏற்றி, இறக்க வேண்டும் என்ற நடைமுறையை அனைத்து அரசு பேருந்துகளும் பின்பற்றுவதை போக்குவரத்து துறை அதிகாரிகள் உறுதி செய்ய வேண்டும் என பொதுமக்கள் வலியுறுத்தியுள்ளனர். பயணிகளின் பாதுகாப்பை முதன்மையாகக் கொண்டு, விதிமுறைகளை கடுமையாக அமல்படுத்தினால் மட்டுமே இந்த பிரச்சினைக்கு நிரந்தர தீர்வு கிடைக்கும் என்றும் அவர்கள் தெரிவித்துள்ளனர்.
