மேல்மருவத்தூர் மற்றும் கூடுவாஞ்சேரியில் அடுத்தடுத்து ஏற்பட்ட தீ விபத்து சம்பவங்கள் பரபரப்பை ஏற்படுத்தியுள்ளன.

🔥 எலக்ட்ரிக்கல் கடையில் பயங்கர தீ… ரூ.3 கோடி பொருட்கள் சாம்பல்

செங்கல்பட்டு மாவட்டம் மேல்மருவத்தூர் அருகே உள்ள சோத்துப்பாக்கம் பகுதியில் சதீஷ் (45) என்பவருக்கு சொந்தமான எலக்ட்ரிக்கல் கடையில் நேற்று மதியம் திடீரென தீ விபத்து ஏற்பட்டது. கடையில் இருந்து கரும்புகை வெளியேறுவதை கவனித்த ஊழியர்கள் உடனடியாக வெளியேறியதால் உயிரிழப்பு தவிர்க்கப்பட்டது. தீ மளமளவென பரவி கடையில் இருந்த மின்சாதன பொருட்கள் அனைத்தையும் சூழ்ந்தது. தகவலறிந்து சம்பவ இடத்திற்கு விரைந்த மதுராந்தகம் மற்றும் அச்சிறுபாக்கம் தீயணைப்பு நிலைய வீரர்கள் சுமார் ஐந்து மணி நேரம் போராடி தீயை கட்டுக்குள் கொண்டு வந்தனர். இந்த விபத்தில் சுமார் ரூ.3 கோடி மதிப்பிலான மின்சாதனங்கள் எரிந்து நாசமானதாக கூறப்படுகிறது. தீ விபத்து காரணமாக சோத்துப்பாக்கம்–வந்தவாசி மாநில நெடுஞ்சாலையில் பல மணி நேரம் போக்குவரத்து நெரிசல் ஏற்பட்டது.

🚒 கூடுவாஞ்சேரி ரயில்வே மேம்பாலத்தில் மர்மமாக எரிந்த மொபட்

மற்றொரு சம்பவமாக, செங்கல்பட்டு மாவட்டம் கூடுவாஞ்சேரியில் நேற்று முன்தினம் நள்ளிரவு வடமாநிலத்தைச் சேர்ந்ததாக கூறப்படும் ஆண் மற்றும் பெண் ஒருவர் மொபட்டில் மாடம்பாக்கம் நோக்கி ரயில்வே மேம்பாலத்தில் சென்று கொண்டிருந்தபோது, வாகனம் திடீரென தீப்பற்றி எரிந்ததாக தகவல் வெளியாகியுள்ளது. தீப்பற்றியதும் இருவரும் மொபட்டை அங்கேயே விட்டுவிட்டு தப்பிச் சென்றதாக கூறப்படுகிறது. தகவலறிந்த மறைமலைநகர் தீயணைப்பு துறையினர் மற்றும் கூடுவாஞ்சேரி போலீசார் சம்பவ இடத்திற்கு விரைந்து வந்து தீயை அணைத்து, எரிந்து சேதமடைந்த மொபட்டை அப்புறப்படுத்தினர்.

👮 போலீசார் தீவிர விசாரணை… பல கோணங்களில் ஆய்வு

இரு தீ விபத்து சம்பவங்களும் தொடர்பாக போலீசார் தனித்தனியாக வழக்குப்பதிவு செய்து விசாரணை நடத்தி வருகின்றனர். மேல்மருவத்தூர் எலக்ட்ரிக்கல் கடையில் ஏற்பட்ட தீ விபத்து மின் கசிவு காரணமாக ஏற்பட்டதா அல்லது வேறு காரணமா என்பது குறித்து விசாரணை நடைபெற்று வருகிறது. அதேபோல், கூடுவாஞ்சேரியில் மொபட்டை ஓட்டி வந்தவர்கள் வடமாநில தம்பதியரா அல்லது வேறு யாரா என்பது குறித்து போலீசார் விசாரித்து வருகின்றனர். மேலும், மொபட் தானாக தீப்பற்றி எரிந்ததா அல்லது யாரேனும் தீ வைத்து கொளுத்திவிட்டு தப்பிச் சென்றார்களா என்பதையும் பல்வேறு கோணங்களில் ஆய்வு செய்து, சம்பவ இடத்திலுள்ள கண்காணிப்பு கேமரா காட்சிகளை ஆய்வு செய்து வருகின்றனர்.