வழக்கு நிலுவையில் இருந்த நிலத்தை விற்றதாக தொடரப்பட்ட வழக்கில், ரியல் எஸ்டேட் நிறுவனத்திற்கு செங்கல்பட்டு மாவட்ட நுகர்வோர் நீதிமன்றம் முக்கிய உத்தரவு பிறப்பித்துள்ளது.

⚖️ வழக்கு நிலுவையில் இருந்த நிலம் விற்பனை

நாகப்பட்டினத்தைச் சேர்ந்த மதுராம்பிகை என்பவர்  வெங்கம்பாக்கத்தில் செயல்பட்டு வரும் ரைட் சாய்ஸ் எஸ்.பி. புரமோட்டர்ஸ் பிரைவேட் லிமிடெட் நிறுவனத்திடம் நிலம் வாங்கி உள்ளார்.   தாம்பரம் அருகே உள்ள இந்த நிலத்தை ₹49,03,600 செலுத்தி வாங்கி, தனது பெயரில் பதிவு செய்தார். சொத்து வாங்கிய சில காலத்திற்குப் பிறகு, இரண்டு பெண்கள் மதுராம்பிகைக்கு வழக்கறிஞர் நோட்டீஸ் அனுப்பினர். அதில், அவர் வாங்கிய நிலம் தொடர்பாக ஏற்கனவே நீதிமன்றத்தில் வழக்கு நிலுவையில் இருப்பதாகவும், அந்த சூழ்நிலையில் எவ்வாறு அந்த சொத்து வாங்கப்பட்டது எனவும் விளக்கம் கேட்டிருந்தனர்.

🏛️ நுகர்வோர் நீதிமன்றத்தை நாடிய பாதிக்கப்பட்ட பெண்

இதனால் அதிர்ச்சியடைந்த மதுராம்பிகை, வழக்கு நிலுவையில் உள்ள சொத்தை மறைத்து விற்பனை செய்ததாக குற்றம்சாட்டி, ரியல் எஸ்டேட் நிறுவனத்திற்கு எதிராக செங்கல்பட்டு மாவட்ட நுகர்வோர் குறைதீர் ஆணையத்தில் வழக்கு தொடர்ந்தார். வழக்கின் போது, நிலத்தின் சட்ட நிலை குறித்து உரிய தகவலை வழங்காமல் விற்பனை செய்ததாகவும், இதனால் தனக்கு நிதி இழப்பும் மன உளைச்சலும் ஏற்பட்டதாகவும் அவர் மனுவில் குறிப்பிட்டிருந்தார்.

📜 நீதிமன்றத்தின் அதிரடி உத்தரவு

இந்த வழக்கை விசாரித்த செங்கல்பட்டு மாவட்ட நுகர்வோர் குறைதீர் ஆணையத்தின் தலைவர் காசிபாண்டியன் மற்றும் உறுப்பினர் ஜவஹர் ஆகியோர் முக்கிய தீர்ப்பை வழங்கினர். அதன்படி, மதுராம்பிகை செலுத்திய ₹49,03,600 முழுத் தொகையையும் ஆண்டு 9 சதவீத வட்டியுடன் திருப்பிச் செலுத்த வேண்டும் என்று ரியல் எஸ்டேட் நிறுவனத்திற்கு உத்தரவிடப்பட்டது. மேலும், மாநில நுகர்வோர் நல நிதியத்திற்கு ₹61,29,500 (அறுபத்து ஒரு லட்சத்து இருபத்தொன்பது ஆயிரத்து ஐநூறு ரூபாய்) செலுத்தவும் நீதிமன்றம் உத்தரவிட்டது. வழக்கு நிலுவையில் உள்ள சொத்துகளை வாங்கும் முன் உரிய சட்ட ஆவணங்களை முழுமையாக சரிபார்க்க வேண்டியதன் அவசியத்தை இந்த தீர்ப்பு மீண்டும் வலியுறுத்துவதாக சட்ட வல்லுநர்கள் கருத்து தெரிவிக்கின்றனர்.