திருப்போரூர் அருகே ஆலத்தூர் ஏரியில் மண் எடுப்பதற்கு எதிர்ப்பு தெரிவித்து கிராம மக்கள் மூன்றாவது முறையாக முற்றுகை போராட்டத்தில் ஈடுபட்டதால் பரபரப்பு ஏற்பட்டது.

🚜 மூன்றாவது முறையாக லாரிகள் தடுத்து நிறுத்தம்

திருப்போரூர் அடுத்த ஆலத்தூர் ஊராட்சியில் உள்ள பெரிய ஏரியில், மாமல்லன் நீர்த்தேக்கத் திட்டத்திற்காக அரசு அனுமதியுடன் தனியார் நிறுவனம் மண் எடுக்க ஒப்பந்தம் பெற்றுள்ளது. இதற்காக கடந்த 11 மற்றும் 17-ஆம் தேதிகளில் மண் அள்ளும் பணிகள் தொடங்க முயற்சிக்கப்பட்டபோதும், கிராம மக்கள் லாரிகளை முற்றுகையிட்டு எதிர்ப்பு தெரிவித்ததால் பணிகள் நிறுத்தப்பட்டன. இதையடுத்து மாவட்ட நிர்வாகம் மற்றும் தாலுகா அலுவலகத்தில் நடைபெற்ற சமரச பேச்சுவார்த்தையிலும் எந்த உடன்பாடும் எட்டப்படவில்லை.

🌊 ஏரிக்குள் இறங்கி போராட்டம்

இந்நிலையில் நேற்று மீண்டும் வருவாய்த்துறை, நீர்வளத்துறை அதிகாரிகள் மற்றும் ஒப்பந்ததாரர் லாரிகளுடன் ஏரிக்கு வந்தனர். இதையறிந்த ஆலத்தூர் மற்றும் சுற்றுவட்டார கிராம மக்கள் ஏரிக்குள் இறங்கி லாரிகளை தடுத்து நிறுத்தி போராட்டத்தில் ஈடுபட்டனர். தாசில்தார் ஆறுமுகம், போலீஸ் இன்ஸ்பெக்டர் ராஜாங்கம் உள்ளிட்டோர் பொதுமக்களிடம் பேச்சுவார்த்தை நடத்தியபோதும் உடன்பாடு ஏற்படவில்லை. இதையடுத்து மண் எடுக்கும் பணி மூன்றாவது முறையாக தற்காலிகமாக நிறுத்தப்பட்டு, வாகனங்கள் திருப்பி அனுப்பப்பட்டன.

⚖️ நிலத்தடி நீர் பாதிப்பு அச்சம்

சிட்கோ தொழிற்பேட்டையில் இயங்கும் ரசாயன தொழிற்சாலைகளால் ஏற்கனவே நிலத்தடி நீர் பாதிக்கப்பட்டுள்ளதாக கிராம மக்கள் குற்றம்சாட்டுகின்றனர். இந்த ஏரி விவசாயம் மற்றும் குடியிருப்புகளுக்கான முக்கிய நீராதாரமாக இருப்பதால், மண் எடுப்பால் மேலும் பாதிப்பு ஏற்படும் என அவர்கள் அச்சம் தெரிவித்துள்ளனர். இதுதொடர்பாக நீதிமன்றத்தில் வழக்கும் தொடரப்பட்டுள்ளதாகவும், வரும் 30-ஆம் தேதி விசாரணை நடைபெற உள்ளதால் அதுவரை மண் எடுக்கும் பணியை நிறுத்தி வைக்க வேண்டும் என்றும் வலியுறுத்தினர். பின்னர் அதிகாரிகளுடன் வாக்குவாதம் ஏற்பட்டதால் அப்பகுதியில் பரபரப்பு நிலவியது.