அமெரிக்கா மற்றும் ஈரான் நாடுகளுக்கு இடையே நாளுக்கு நாள் போர் மேகங்கள் சூழ்ந்து மிகக் கடுமையான மோதல் போக்கு நிலவி வரும் அசாத்திய சூழலில், ஈரான் நாட்டின் கடல் பகுதியில் 28 இந்திய மாலுமிகளுடன் பயணித்த ‘திஷா’ (DISHA) என்ற எல்.பி.ஜி (LPG) எரிவாயு டேங்கர் வணிகக் கப்பல் மீது திடுக்கிடும் வகையில் ஏவுகணைத் தாக்குதல் நடத்தப்பட்டுள்ளது.

இந்தத் தாக்குதலில் இருந்து கப்பல் அசாத்தியமாகத் தப்பிய நிலையில், அதில் பணியாற்றி வந்த 28 இந்தியப் பணியாளர்களும் எவ்விதக் காயமுமின்றிப் பாதுகாப்பாக இருப்பதாகத் தஹ்ரானில் உள்ள இந்தியத் தூதரகம் அதிகாரப்பூர்வமாக உறுதிப்படுத்தியுள்ளது. மத்திய கிழக்கு ஆசியப் பகுதியில் உள்ள மிக முக்கிய சர்வதேசக் கடல் பாதையான ஹார்முஸ் ஜலசந்தி (Strait of Hormuz) அருகே மொசாம்பிக் நாட்டின் கொடியுடன் பயணித்த ‘திஷா’ எல்.பி.ஜி சரக்குக் கப்பல் மீது இந்தத் திடீர் வான்வழித் தாக்குதல் நடத்தப்பட்டதாகத் தகவல்கள் வெளியாகியுள்ளன. கப்பல் ஈரான் கடல் எல்லைக்குள் நுழைந்த போது, அடையாளம் தெரியாத ஏவுகணைத் தாக்குதலுக்கு உள்ளானதைத் தொடர்ந்து கப்பலிலிருந்து உடனடியாக ஆபத்து கால அவசர எச்சரிக்கை சமிக்ஞை அனுப்பட்டது.

இதனையடுத்து ஈரான் கடற்படை மற்றும் உள்ளூர் பாதுகாப்பு அதிகாரிகளின் உதவியோடு மீட்பு கண்காணிப்புப் பணிகள் போர்க்கால அடிப்படையில் முடுக்கப்பட்டன. கப்பலில் பயணித்த 28 இந்திய மாலுமிகளின் பாதுகாப்பு குறித்துத் தாயகத்தில் உள்ள அவர்களின் குடும்பத்தினர் பெரும் அச்சத்தில் ஆழ்ந்திருந்த நிலையில், தஹ்ரானில் உள்ள இந்தியத் தூதரகம் உடனுக்குடன் களத்தில் இறங்கியது. தூதரக அதிகாரிகள் சம்பந்தப்பட்ட ஈரான் நாட்டு உயர் அதிகாரிகளுடன் நேரடித் தொடர்பில் இருந்து நிலைமையை மிகத் தீவிரமாகக் கண்காணித்து வருகின்றனர். மேலும், “கப்பலில் இருந்த 28 இந்தியப் பணியாளர்களும் முற்றிலும் பாதுகாப்பாக உள்ளனர்; அவர்கள் நிலைமை குறித்துத் தொடர்ந்து கண்காணித்து வருகிறோம்” என இந்தியத் தூதரகம் தனது அதிகாரப்பூர்வ அறிக்கையில் தெரிவித்துள்ளதால், ஒட்டுமொத்த இந்தியக் குடும்பங்களும் நிம்மதிப் பெருமூச்சு விட்டுள்ளன.

சர்வதேசக் கடல் பாதைகளில் வணிகக் கப்பல்கள் மற்றும் அப்பாவி மாலுமிகள் மீது நடத்தப்படும் இதுபோன்ற ஆபத்தான தாக்குதல்கள் எக்காரணம் கொண்டும் ஏற்றுக்கொள்ள முடியாதவை என்றும், கடல்சார் பாதுகாப்பு வழிகாட்டுதல்கள் உடனடியாக வலுப்படுத்தப்பட வேண்டும் என்றும் இந்திய வெளியுறவுத் துறை அமைச்சகம் சார்பிலும் கவலை தெரிவிக்கப்பட்டுள்ளது.