தமிழக சட்டமன்றத் தேர்தல் வாக்குப்பதிவின்போது தஞ்சாவூர் மாவட்டம் பாபநாசம் தொகுதியில் போட்டியிட்ட அனீஸ் பாத்திமா மீது தாக்குதல் நடந்ததாக குற்றச்சாட்டு எழுந்துள்ளது. நாம் தமிழர் கட்சி சார்பில் போட்டியிட்ட இவர், வாக்குப்பதிவு நிலவரத்தை பார்வையிட அம்மாப்பேட்டை அருகேயுள்ள உக்கடை கிராம வாக்குச்சாவடிக்கு சென்றிருந்தார்.

அப்போது சிலர் அவரை உள்ளே செல்லத் தடுத்து, ஏற்பட்ட வாக்குவாதத்தில் தள்ளியதாகவும் கூறப்படுகிறது. இதில் அவர் மயக்கம் அடைந்த நிலையில், தஞ்சாவூர் அரசு மருத்துவமனையில் சிகிச்சைக்காக அனுமதிக்கப்பட்டார். இந்த சம்பவம் தேர்தல் நாளில் பரபரப்பை ஏற்படுத்தியது.

இதுகுறித்து கட்சியின் தலைமை ஒருங்கிணைப்பாளர் Seeman கடும் கண்டனம் தெரிவித்துள்ளார். கர்ப்பிணி பெண் என்பதையும் பொருட்படுத்தாமல் தாக்குதல் நடத்தியவர்களுக்கு எதிராக கடுமையான நடவடிக்கை எடுக்க வேண்டும் என அவர் வலியுறுத்தினார். குற்றவாளிகள் மீது வழக்குப் பதிவு செய்து உடனடி கைது செய்யாவிட்டால் போராட்டம் நடத்தப்படும் என எச்சரிக்கை விடுத்துள்ளார்.

இந்த சம்பவம் குறித்து போலீசார் விசாரணை மேற்கொண்டு வருகின்றனர். தேர்தல் நாளில் ஏற்பட்ட இந்த நிகழ்வு அரசியல் வட்டாரங்களில் கவனம் ஈர்த்துள்ளது.