வண்டலூர் அருகே மேலக்கோட்டையூர் காவலர் குடியிருப்பில் குடிநீர் தட்டுப்பாடு மற்றும் அடிப்படை வசதிகள் இல்லாததால் குடியிருப்புவாசிகள் அவதிப்பட்டு வருவதாக புகார் எழுந்துள்ளது.

🚰 குடிநீர் இல்லாமல் தவிக்கும் காவலர் குடியிருப்பு…  😟

செங்கல்பட்டு மாவட்டம், வண்டலூர் அடுத்துள்ள மேலக்கோட்டையூர் காவலர் குடியிருப்பில் கடந்த சில ஆண்டுகளாக குடிநீர் தட்டுப்பாடு மற்றும் அடிப்படை வசதிகள் இல்லாததால் ஆயிரக்கணக்கான குடும்பங்கள் கடும் சிரமத்தை சந்தித்து வருகின்றனர். 2016-ஆம் ஆண்டு ஓய்வுபெற்ற போலீசார் மற்றும் காவல்துறை அதிகாரிகளுக்காக 2,673 வீடுகள் கொண்ட குடியிருப்பு அமைக்கப்பட்ட நிலையில், அங்கு வசிக்கும் மக்களின் அத்தியாவசிய தேவைகள் இன்னும் முழுமையாக பூர்த்தி செய்யப்படவில்லை என குற்றச்சாட்டு எழுந்துள்ளது.

💧 நீர்வரத்து குறைந்ததால் கடும் குடிநீர் தட்டுப்பாடு 🚛

இந்த குடியிருப்புக்கு கீழக்கோட்டையூரில் உள்ள 4.5 ஏக்கர் பரப்பளவிலான கல்குவாரி குட்டையில் இருந்து குழாய்கள் மூலம் குடிநீர் வழங்கப்பட்டு வந்தது. ஆனால், கடந்த மூன்று ஆண்டுகளாக அந்த குட்டையில் நீர்வரத்து குறைந்ததால், மழைக்காலத்தைத் தவிர பிற நாட்களில் குடிநீர் விநியோகம் பாதிக்கப்பட்டுள்ளது. இதனால், குடியிருப்புவாசிகள் அதிக விலை கொடுத்து டேங்கர் லாரிகள் மூலம் குடிநீரை வாங்கி பயன்படுத்தும் நிலைக்கு தள்ளப்பட்டுள்ளதாக அவர்கள் வேதனை தெரிவிக்கின்றனர்.

🏗️ அடிப்படை வசதிகளை நிறைவேற்ற வேண்டும் என வலியுறுத்தல் 🙏

வீடுகள் ஒதுக்கப்பட்டபோது கழிவுநீர் கால்வாய், மழைநீர் வடிகால், சுகாதார மையம், சமுதாயக் கூடம் உள்ளிட்ட வசதிகள் ஏற்படுத்தித் தரப்படும் என உறுதியளிக்கப்பட்டதாக குடியிருப்புவாசிகள் கூறுகின்றனர். ஆனால், இதுவரை அந்த வசதிகள் முழுமையாக ஏற்படுத்தப்படவில்லை என்றும், பலமுறை மாவட்ட கலெக்டர் அலுவலகம், முதல்வர் தனிப்பிரிவு மற்றும் சம்பந்தப்பட்ட துறை அதிகாரிகளிடம் மனுக்கள் அளித்தும் நடவடிக்கை எடுக்கப்படவில்லை என்றும் அவர்கள் குற்றம்சாட்டுகின்றனர். புதிய அரசு மற்றும் சம்பந்தப்பட்ட துறைகள் விரைந்து நடவடிக்கை எடுத்து குடிநீர் பிரச்சினைக்கு நிரந்தர தீர்வு காணவும், வாக்குறுதியளிக்கப்பட்ட அனைத்து அடிப்படை வசதிகளையும் செய்து தரவும் குடியிருப்புவாசிகள் கோரிக்கை விடுத்துள்ளனர்.