செங்கல்பட்டு அருகே பாழடைந்த தொழிற்சாலையில் ஏற்பட்ட பயங்கர தீ விபத்தால், அப்பகுதி முழுவதும் கரும்புகை சூழ்ந்தது. இதனால் செங்கல்பட்டு – ஸ்ரீபெரும்புதூர் மாநில நெடுஞ்சாலையில் சென்ற வாகன ஓட்டிகள் மூச்சுத்திணறல் ஏற்பட்டு கடும் அவதிக்குள்ளாகினர்.

பிளாஸ்டிக் கழிவுகளில் பற்றிய தீ

செங்கல்பட்டு மாவட்டம், சிங்கப்பெருமாள் கோவில் அடுத்த தெரல்லிமேடு பகுதியில் செயல்படாமல் பாழடைந்து கிடந்த குழாய் தயாரிப்பு தொழிற்சாலை ஒன்று உள்ளது. இந்தத் தொழிற்சாலையின் வெளிப்புறத்தில் பிளாஸ்டிக் கழிவுகள் மற்றும் பிளாஸ்டிக் குழாய்கள் வைக்கப்பட்டிருந்தன.

இந்நிலையில், அங்கிருந்த பிளாஸ்டிக் பொருட்களில் திடீரென தீப்பற்றி எரியத் தொடங்கியது. பிளாஸ்டிக் பொருட்கள் அதிகளவில் இருந்ததால் தீ மளமளவெனப் பரவி, தொழிற்சாலை முழுவதும் கொழுந்துவிட்டு எரிந்தது.

இரண்டு மணி நேரப் போராட்டத்திற்குப் பிறகு தீ கட்டுக்குள் வந்தது

தீ விபத்தைக் கண்ட அவ்வழியாகச் சென்ற பொதுமக்கள் உடனடியாக மகேந்திரா சிட்டி தீயணைப்புத் துறையினருக்குத் தகவல் தெரிவித்தனர்.

இதையடுத்து, தீயணைப்பு அலுவலர் வீரராகவன் தலைமையில் சம்பவ இடத்திற்கு விரைந்து வந்த தீயணைப்பு வீரர்கள், சுமார் இரண்டு மணி நேரத்திற்கும் மேலாகப் போராடி தீயைக் கட்டுக்குள் கொண்டு வந்தனர்.

கரும்புகையால் வாகன ஓட்டிகள் அவதி

பிளாஸ்டிக் பொருட்கள் அதிகளவில் எரிந்ததால் அப்பகுதி முழுவதும் கடுமையான கரும்புகை சூழ்ந்தது. தீ விபத்து ஏற்பட்ட இடம் செங்கல்பட்டு – ஸ்ரீபெரும்புதூர் மாநில நெடுஞ்சாலையை ஒட்டி அமைந்துள்ளதால், அந்த வழியாகச் சென்ற வாகன ஓட்டிகள் பெரும் சிரமத்திற்கு ஆளாகினர்.

குறிப்பாக, இருசக்கர வாகனங்களில் சென்றவர்கள் புகையால் மூச்சுத்திணறல் ஏற்பட்டு, மூக்கை மூடியபடியே அந்தப் பகுதியைக் கடந்து சென்றனர்.

போலீசார் விசாரணை

இந்தத் தீ விபத்து குறித்து தீயணைப்புத் துறையினர் சிங்கப்பெருமாள் கோவில் காவல் நிலையத்திற்குத் தகவல் தெரிவித்தனர். இதையடுத்து, போலீசார் வழக்குப் பதிவு செய்து தீ விபத்துக்கான காரணம் குறித்து விசாரணை மேற்கொண்டு வருகின்றனர்.