செங்கல்பட்டு மாவட்டம் கூடுவாஞ்சேரியில் சிலிண்டர் வெடித்து ஏற்பட்ட தீ விபத்தில் தேநீர்க் கடை முற்றிலும் எரிந்து சேதமடைந்தது. அருகிலிருந்த உணவகத்திற்கும் தீ பரவியதுடன், அங்கு நிறுத்தப்பட்டிருந்த இரண்டு இருசக்கர வாகனங்களும் தீயில் கருகின. பொதுமக்கள் மற்றும் தீயணைப்பு வீரர்கள் இணைந்து போராடி தீயைக் கட்டுக்குள் கொண்டு வந்தனர். அதிர்ஷ்டவசமாக இந்த விபத்தில் உயிர்ச்சேதமோ, காயங்களோ ஏற்படவில்லை.

தேநீர்க் கடையில் திடீர் சிலிண்டர் வெடிப்பு!

செங்கல்பட்டு மாவட்டம், நந்திவரம் – கூடுவாஞ்சேரியில் இருந்து திருப்போரூர் செல்லும் நெல்லிக்குப்பம் சாலையில், அரசு ஆதிதிராவிடர் நல தொடக்கப் பள்ளி எதிரே கிருஷ்ணகுமார் என்பவர் ‘ஆலடிப்பட்டியான்’ என்ற பெயரில் தேநீர்க் கடை நடத்தி வருகிறார்.

இந்த நிலையில், அவரது தேநீர்க் கடையில் திடீரென சிலிண்டர் வெடித்து பயங்கர தீ விபத்து ஏற்பட்டது. தீ கொழுந்துவிட்டு எரியத் தொடங்கிய நிலையில், அருகில் இருந்த மற்றொரு உணவகத்திற்கும் தீ பரவி வேகமாக எரிந்தது.

பொதுமக்களுடன் இணைந்து தீயை அணைத்த வீரர்கள்!

இதுகுறித்துத் தகவல் அறிந்து சம்பவ இடத்திற்கு விரைந்து வந்த மறைமலைநகர் தீயணைப்புத் துறையினர் தீயை அணைக்கும் பணியில் ஈடுபட்டனர்.

10-க்கும் மேற்பட்ட தீயணைப்பு வீரர்களுடன் அப்பகுதி பொதுமக்களும் இணைந்து, சுமார் 30 நிமிடங்களுக்கும் மேலாகப் போராடினர். தொடர்ந்து தண்ணீரைப் பீய்ச்சி அடித்து தீயைக் கட்டுக்குள் கொண்டு வந்தனர்.

தேநீர்க் கடை முற்றிலும் சேதம் – இரண்டு வாகனங்கள் எரிந்தன!

இந்தத் தீ விபத்தில் தேநீர்க் கடை முற்றிலும் எரிந்து சேதமடைந்தது. மேலும், அருகிலிருந்த உணவக வளாகத்தில் நிறுத்தி வைக்கப்பட்டிருந்த இரண்டு இருசக்கர வாகனங்களும் தீயில் கருகின.

இருப்பினும், இந்த விபத்தில் யாருக்கும் உயிர்ச்சேதமோ அல்லது காயங்களோ ஏற்படவில்லை. இதனால் அப்பகுதி மக்கள் நிம்மதியடைந்தனர்.

கூடுவாஞ்சேரி – திருப்போரூர் சாலையில் போக்குவரத்து பாதிப்பு

தீ விபத்து காரணமாக அப்பகுதி முழுவதும் கடுமையான புகைமூட்டம் சூழ்ந்தது. இதனால் கூடுவாஞ்சேரி – திருப்போரூர் சாலையில் சிறிது நேரம் போக்குவரத்தும் பாதிக்கப்பட்டது.

இந்தச் சம்பவம் குறித்து கூடுவாஞ்சேரி போலீசார் வழக்குப் பதிவு செய்து விசாரணை மேற்கொண்டு வருகின்றனர்.