“ஜி-பே மூலம் ஆபாச மெசேஜ்.. உபெர் டிரைவரின் கைவரிசை!

சென்னையில் உபெர் (Uber) கார் டாக்ஸியில் பயணித்த ஆர்டிஸ்ட் டைரக்டர் இளம்பெண்ணின் ஜி-பே (G-Pay) எண்ணை வைத்து, விடிய விடிய ஆபாசக் குறுஞ்செய்திகளை அனுப்பிப் பாலியல் தொல்லை கொடுத்த கார் டாக்ஸி ஓட்டுநரின் அசிங்கமான செயல் வெளிச்சத்திற்கு வந்துள்ளது. இதுகுறித்து முதலமைச்சர் அலுவலகம் மற்றும் சைபர் கிரைமில் புகார் அளித்தும் போலீஸார் முறையான நடவடிக்கை எடுக்கவில்லை எனப் பட இயக்குநர் குற்றம் சாட்டியுள்ளார்.

‘மனிதன் தெய்வமாகலாம்’ என்ற திரைப்படத்தின் இயக்குநர் டென்னிஸ் மஞ்சுநாத். இவரது தோழியான ஸ்வப்னா என்பவர் சினிமா துறையில் ஆர்டிஸ்ட் டைரக்டராகப் பணியாற்றி வருகிறார். நேற்று மதியம் ஸ்வப்னா சென்னை வண்டலூரிலிருந்து கோடம்பாக்கத்தில் உள்ள ஒரு தேவாலயத்திற்குச் செல்வதற்காக உபெர் செயலி மூலம் கார் டாக்ஸி ஒன்றை புக் செய்துள்ளார். காரை சரண் ராஜ் என்ற ஓட்டுநர் ஓட்டி வந்துள்ளார். ஸ்வப்னா காரில் ஏறியதுமே, காரின் முன் கண்ணாடியை அவரை நோக்கிச் சரிசெய்து, அந்த ஓட்டுநர் ஒரு மாதிரியாகப் பார்த்துக் கொண்டே வந்துள்ளார்.

இதனைத் தொடர்ந்து, அந்தப் பெண் பயணக் கட்டணத்தை கூகுள் பே (G-Pay) மூலம் ஓட்டுநருக்கு அனுப்பியுள்ளார். இதில் அந்தப் பெண்ணின் அலைபேசி எண் கிடைத்ததும், ஓட்டுநர் சரண் ராஜ் நேற்றிரவு முழுவதும் ஜி-பே செயலி வழியாகவே ஸ்வப்னாவிற்கு மிக ஆபாசமான குறுஞ்செய்திகளை அனுப்பித் தொடர் பாலியல் தொந்தரவு கொடுத்துள்ளார். இதனால் அதிர்ச்சியடைந்த அந்தப் பெண், தனது நண்பரான இயக்குநர் டென்னிஸ் மஞ்சுநாத்திடம் விபரத்தைக் கூறி அழுதுள்ளார்.

உடனடியாகத் தனது தோழிக்காகக் களமிறங்கிய இயக்குநர் மஞ்சுநாத், சம்பந்தப்பட்ட சிம் கார்டு அலுவலகம் மற்றும் ஆன்லைன் சைபர் கிரைம் பிரிவிலும், முதலமைச்சர் அலுவலக (CM Cell) இணையதளத்திலும் உத்தியோகபூர்வமாகப் புகார் அளித்துள்ளார். மேலும் இன்று காலை தாம்பரம் அருகே உள்ள ஓட்டேரி காவல் நிலையத்திலும் நேரில் புகார் அளிக்கப்பட்டுள்ளது. ஆனால், இவ்வளவு தூரம் பாலியல் தொல்லைகளுக்கு ஆதாரங்கள் இருந்தும், ஓட்டேரி போலீஸார் தரப்பில் முறையான விசாரணை நடத்தப்படவில்லை என இயக்குநர் டென்னிஸ் மஞ்சுநாத் பகிரங்கமாகக் குற்றஞ்சாட்டியுள்ளார்.

அமைச்சர் செங்கோட்டையன் மற்றும் சட்டம் ஒழுங்கு ஏடிஜிபி டி.எஸ்.அன்பு ஆகியோர் பெண்களுக்கு எதிரான குற்றங்களில் 24 மணி நேர ஆக்‌ஷன் எடுக்கப்படும் எனத் தெரிவித்து வரும் சூழலில், சென்னை புறநகரில் நடந்துள்ள இந்த ஆன்லைன் பாலியல் தொல்லை விவகாரமும், காவல்துறையின் மெத்தனப் போக்கும் சினிமா காரிடார்களிலும் சமூக வலைத்தள டிஜிட்டல் மேடைகளிலும் பெரும் விவாதத்தை முடுக்கிவிட்டுள்ளது.

x