செங்கல்பட்டு பைபாஸ் சாலையில் அதிவேகமாக வந்த கார் இருசக்கர வாகனத்தின் மீது மோதிய விபத்தில், பகுதிநேர ராப்பிடோ பைக் ஓட்டுனர் சம்பவ இடத்திலேயே பரிதாபமாக உயிரிழந்தார்.
செங்கல்பட்டு பைபாஸ் சாலையில் அதிவேகமாக வந்த கார் மோதிய விபத்தில், சொந்த ஊரிலிருந்து சென்னை திரும்பிக் கொண்டிருந்த சங்கரன்கோவிலைச் சேர்ந்த பகுதிநேர ராப்பிடோ பைக் ஓட்டுனர் பாலகிருஷ்ணன் சம்பவ இடத்திலேயே உயிரிழந்தார்.
தென்காசி மாவட்டம் சங்கரன்கோவில் பகுதியைச் சேர்ந்தவர் பாலகிருஷ்ணன் (31). இவர் சென்னையில் உள்ள ஒரு தனியார் நிறுவனத்தில் பணிபுரிந்து கொண்டே, வருமானத்திற்காகப் பகுதிநேர வேலையாகத் தனது இருசக்கர வாகனத்தில் ராப்பிடோ (Rapido) பைக் ஓட்டும் பணியையும் செய்து வந்தார். விடுமுறை நாட்களின் போது சென்னையிலிருந்து தனது இருசக்கர வாகனத்திலேயே சொந்த ஊருக்குச் சென்று வருவதைப் பாலகிருஷ்ணன் வழக்கமாகக் கொண்டிருந்தார்.
அந்த வகையில், விடுமுறை முடிந்து சொந்த ஊரிலிருந்து மீண்டும் சென்னைக்கு இருசக்கர வாகனத்தில் அவர் திரும்பிக் கொண்டிருந்தார். செங்கல்பட்டு பைபாஸ் சாலையில் அவர் வந்துகொண்டிருந்த போது, பின்னால் அதிவேகமாக வந்த கார் ஒன்று எதிர்பாராதவிதமாக அவரது இருசக்கர வாகனத்தின் மீது பலமாக மோதியது. இந்த விபத்தின் தாக்கத்தால் தூக்கி வீசப்பட்ட பாலகிருஷ்ணன், பலத்த காயமடைந்து சம்பவ இடத்திலேயே துடிதுடித்து உயிரிழந்தார்.
விபத்து குறித்து தகவல் அறிந்து சம்பவ இடத்திற்கு விரைந்து வந்த செங்கல்பட்டு தாலுகா போலீசார், பாலகிருஷ்ணனின் உடலை மீட்டு உடற்கூறு ஆய்வுக்காகச் செங்கல்பட்டு அரசு மருத்துவமனைக்கு அனுப்பி வைத்தனர். மேலும், இந்த விபத்து குறித்து வழக்குப் பதிவு செய்துள்ள போலீசார், விபத்தை ஏற்படுத்திவிட்டு நிற்காமல் சென்ற கார் மற்றும் அதன் ஓட்டுனர் குறித்து அப்பகுதியில் உள்ள கண்காணிப்பு கேமரா (CCTV) காட்சிகளை ஆய்வு செய்து தீவிர விசாரணை மேற்கொண்டு வருகின்றனர். சொந்த ஊரிலிருந்து சென்னை திரும்பிய இளைஞர் சாலை விபத்தில் உயிரிழந்த சம்பவம் அவரது குடும்பத்தினர் மற்றும் அப்பகுதியினர் மத்தியில் பெரும் சோகத்தை ஏற்படுத்தியுள்ளது.
