கூவத்தூர் அருகே முகையூரில் கோவில் விழா தொடர்பாக ஒரே சமுதாயத்தைச் சேர்ந்த இரு தரப்பினர் வாக்குவாதத்தில் ஈடுபட்டதால் பரபரப்பு ஏற்பட்டது.

🛕 கோவில் விழா தொடர்பாக வாக்குவாதம்

கூவத்தூர் அருகே முகையூரில் இந்து சமய அறநிலையத்துறைக்கு சொந்தமான முத்தாலம்மன் கோவில் உள்ளது. இக்கோவிலில் ஆண்டுதோறும் ஆடி மாதம் 4-வது செவ்வாய்க்கிழமை கூழ்வார்த்தல் விழா நடைபெறுவது வழக்கம். இதில் பல்வேறு சமுதாயங்களைச் சேர்ந்தவர்கள் கூழ் தயாரித்து, கோவில் வளாகத்தில் உள்ள கூழ்வார்த்தல் தொட்டியில் ஊற்றி பக்தர்களுக்கு வழங்குவது வழக்கம்.

⚠️ கடந்த கால பிரச்னையால் விழா நிறுத்தம்

கடந்த 2012-ம் ஆண்டு கூழ்வார்த்தல் தொட்டியில் குறிப்பிட்ட ஒரு சமூகத்தினர் கூழ் தயாரித்து ஊற்றக் கூடாது என ஒரு தரப்பினர் தெரிவித்ததால் பிரச்னை ஏற்பட்டதாக கூறப்படுகிறது. இதையடுத்து முத்தாலம்மன் கோவிலில் நடைபெற்று வந்த கூழ்வார்த்தல் நிகழ்வு நிறுத்தப்பட்டது. இந்நிலையில், கிராமணி சமூகத்தைச் சேர்ந்தவர்கள் கடந்த ஆண்டு அப்பகுதியில் முத்துமாரியம்மன் கோவில் கட்டினர். அந்த கோவிலில் நேற்று கூழ்வார்த்தல் விழா நடைபெற்றது.

👮 போலீசார் பேச்சுவார்த்தை

விழா நடைபெற்றபோது, அதே சமூகத்தைச் சேர்ந்த மற்றொரு தரப்பினர் முத்தாலம்மன் கோவிலில் பழையபடி கூழ்வார்த்தல் நிகழ்வை நடத்த வேண்டும் என கூறி வாக்குவாதத்தில் ஈடுபட்டனர். இதனால் அப்பகுதியில் பரபரப்பு ஏற்பட்டது. தகவலறிந்து சம்பவ இடத்திற்கு வந்த கூவத்தூர் போலீசார் இருதரப்பினரிடமும் பேச்சுவார்த்தை நடத்தி சமாதானப்படுத்தினர். இதையடுத்து மோதல் ஏற்படாமல் தடுக்கப்பட்டு, நிலைமை கட்டுக்குள் கொண்டுவரப்பட்டது.