வண்டலூர்–கேளம்பாக்கம் சாலையில் ஊனமாஞ்சேரி சந்திப்பில் நீண்டநாள் கோரிக்கையை தொடர்ந்து நேற்று சிக்னல் அமைக்கப்பட்டதால், வாகன ஓட்டிகள் மற்றும் பொதுமக்கள் நிம்மதி அடைந்தனர்.

🚦 விபத்து அபாயம் நிறைந்த சந்திப்பு

தாம்பரம் அடுத்த வண்டலூர்–கேளம்பாக்கம் இடையிலான 20 கி.மீ., சாலையின் இருபுறமும் 15-க்கும் மேற்பட்ட ஊராட்சிகள், 40-க்கும் அதிகமான இணைப்பு சாலைகள் மற்றும் 20-க்கும் மேற்பட்ட தனியார் கல்லூரிகள், பள்ளிகள் உள்ளன. தாம்பரம், வண்டலூர், ஊரப்பாக்கம், கூடுவாஞ்சேரி உள்ளிட்ட பகுதிகளில் இருந்து ஓ.எம்.ஆர்., சாலையில் உள்ள தகவல் தொழில்நுட்ப நிறுவனங்களுக்கு பணிக்கு செல்வோர் இந்த சாலையை அதிகளவில் பயன்படுத்துகின்றனர். இதனால், தினமும் வாகன போக்குவரத்து அதிகமாக காணப்படுகிறது.

⚠️ சிக்னல் இல்லாமல் தொடர்ந்த விபத்துகள்

இந்த வழித்தடத்தில் ஊனமாஞ்சேரி சந்திப்பு முக்கிய இணைப்பு பகுதியாக உள்ளது. இங்கு நீண்ட காலமாக சிக்னல் வசதி இல்லாததால், பிரதான சாலையில் நேராக செல்லும் வாகனங்களும், சந்திப்பில் திரும்பும் வாகனங்களும் ஒரே நேரத்தில் கடந்து செல்ல முயன்றன. இதனால் அடிக்கடி வாகனங்கள் மோதி விபத்துகள் ஏற்பட்டன. குறிப்பாக காலை, மாலை நேரங்களில் வாகன நெரிசலும் அதிகரித்தது. இதனால் பொதுமக்கள் அச்சத்துடன் சாலையை கடந்து செல்ல வேண்டிய நிலை ஏற்பட்டது.

🙏 கோரிக்கையை ஏற்று சிக்னல் அமைப்பு

விபத்துகளை தடுக்க ஊனமாஞ்சேரி பகுதி மக்கள் மற்றும் சின்னம்மன் கோவில் நிர்வாக குழுவினர் இணைந்து நெடுஞ்சாலைத் துறை, காவல் துறை மற்றும் செங்கல்பட்டு மாவட்ட கலெக்டர் வீரப்பனிடம் சிக்னல் அமைக்க கோரி மனு அளித்தனர். இதையடுத்து அதிகாரிகள் நடவடிக்கை மேற்கொண்டு, ஊனமாஞ்சேரி சந்திப்பில் நேற்று சிக்னல் அமைத்தனர். சிக்னல் செயல்பாட்டுக்கு வந்துள்ளதால், பிரதான சாலையில் செல்லும் வாகனங்கள் மற்றும் சந்திப்பில் திரும்பும் வாகனங்களை ஒழுங்குபடுத்த முடியும் என்பதால், வாகன ஓட்டிகள் மற்றும் பொதுமக்கள் நிம்மதி அடைந்துள்ளனர்.