கவனிப்பாக்கம் அரசுப் பேருந்து ஊர் மக்களின் குடும்பத்தில் ஒருவராக மாறிய நெகிழ்ச்சியான சம்பவம் செங்கல்பட்டு பகுதியில் கவனம் பெற்றுள்ளது. தங்களது கிராமத்திற்கு தினமும் இயக்கப்படும் அரசுப் பேருந்தைச் சொந்த வாகனமாகக் கருதி, கிராம மக்கள் அனைவரும் ஒன்றிணைந்து ஆயுதப் பூஜை கொண்டாடியுள்ளனர்.
செங்கல்பட்டு பேருந்து நிலையத்திலிருந்து கவனிப்பாக்கம் கிராமத்திற்கு T8 என்ற தடம் எண்ணில் அரசுப் பேருந்து தினமும் இயக்கப்பட்டு வருகிறது. கிராம மக்களின் முக்கியப் போக்குவரத்து ஆதாரமாக விளங்கும் இந்தப் பேருந்துக்கு, இந்த ஆண்டு சிறப்பாக ஆயுதப் பூஜை கொண்டாட ஊர் மக்கள் முடிவு செய்தனர்.
அதன்படி, கவனிப்பாக்கம் கிராமத்திற்கு அரசுப் பேருந்து வந்தடைந்ததும், ஊர் மக்கள் அனைவரும் ஒன்றுகூடி பேருந்தைத் தண்ணீரால் கழுவிச் சுத்தம் செய்தனர். தொடர்ந்து பேருந்தின் முகப்பில் வாழை மரங்களைக் கட்டி, சந்தனம் மற்றும் குங்குமம் வைத்து, மலர் மாலை அணிவித்து அலங்கரித்தனர்.
பின்னர் பேருந்தின் ஓட்டுநர் மற்றும் நடத்துநரை மரியாதையுடன் வரவேற்ற கிராம மக்கள், பேருந்தின் முன்பு தேங்காய் உடைத்து கற்பூர தீபாராதனை காட்டி வழிபட்டனர். பயணம் பாதுகாப்பாக அமையவும், திருஷ்டி நீங்கவும் பூசணிக்காய் சுற்றி உடைத்து வழிபாட்டை நிறைவு செய்தனர்.
இதைத்தொடர்ந்து, அங்கு கூடியிருந்த பொதுமக்கள் மற்றும் பேருந்து ஊழியர்களுக்கு இனிப்புகள், பொரி ஆகியவற்றை வழங்கி ஆயுதப் பூஜையைக் கொண்டாடினர்.
இதுகுறித்து மகிழ்ச்சி தெரிவித்த கிராம மக்கள், தங்களைத் தினமும் பாதுகாப்பாக அழைத்துச் சென்று ஊருக்குக் கொண்டு வந்து சேர்க்கும் அரசுப் பேருந்து தங்கள் குடும்பத்தில் ஒரு அங்கம் போன்றது என்றும், அதனால்தான் கிராம மக்கள் அனைவரும் ஒன்றுகூடி ஆயுதப் பூஜை கொண்டாடியதாகவும் தெரிவித்தனர்.
அரசுப் பேருந்துக்கும் அதனை இயக்கும் ஊழியர்களுக்கும் கிராம மக்கள் அளித்த இந்த அன்பும் மரியாதையும் அப்பகுதியில் நெகிழ்ச்சியை ஏற்படுத்தியுள்ளது.
#கவனிப்பாக்கம் #அரசுப்பேருந்து #ஆயுதபூஜை #கிராமமக்கள் #செங்கல்பட்டு #T8பேருந்து #நெகிழ்ச்சியானசம்பவம் #பேருந்துஊழியர்கள் #ஓட்டுநர் #நடத்துநர் #மக்களின்அன்பு #பேருந்துவழிபாடு #பண்டிகைகொண்டாட்டம் #கவனிப்பாக்கம்பேருந்து #Kavanipakkam #GovernmentBus #AyudhaPooja #VillagePeople #Chengalpattu #T8Bus #EmotionalStory #BusCelebration #PublicTransport #BusDrivers #BusConductors #CommunityCelebration #VillageTradition #FestivalCelebration #TamilNaduNews #LocalNews
