தமிழகச் சட்டமன்றத் தேர்தல் வாக்கு எண்ணிக்கையில் நடிகர் விஜய்யின் தமிழக வெற்றிக் கழகம் (தவெக) அசுர பலத்துடன் முன்னிலை பெற்று வருவதைத் தொடர்ந்து, அவருக்குத் திரையுலகைச் சேர்ந்த பல முன்னணி நட்சத்திரங்கள் தங்களின் வாழ்த்துகளைத் தெரிவித்து வருகின்றனர். 2026 தேர்தல் களத்தில் தவெக 109 தொகுதிகளில் முன்னிலை பெற்றுள்ள நிலையில், திரையுலகினர் மற்றும் அரசியல் பிரமுகர்களின் கவனம் விஜய் பக்கம் திரும்பியுள்ளது.
தவெக-வின் இந்த மாபெரும் எழுச்சியைக் கொண்டாடும் வகையில் திரையுலக நட்சத்திரங்கள் சமூக வலைதளங்களில் தங்களின் வாழ்த்துகளைப் பகிர்ந்து வருகின்றனர். தவெக தலைவர் விஜய்யின் வெற்றிகரமான அரசியல் வருகைக்கு நடிகர் சிவகார்த்திகேயன் தனது மனமார்ந்த வாழ்த்துகளைத் தெரிவித்துள்ளார்.
தெலுங்குத் திரையுலகின் முன்னணி நடிகரான நானி, விஜய்யின் இந்தப் புதிய பயணத்திற்கும் தேர்தல் வெற்றிக்கும் வாழ்த்து கூறியுள்ளார்.
இசையமைப்பாளர் ஜி.வி. பிரகாஷ் குமார், வெற்றிப் பாதையில் பயணிக்கும் விஜய்க்குத் தனது வாழ்த்துகளைத் தெரிவித்துக் கொண்டுள்ளார்.
ஏற்கனவே இயக்குநர் வெங்கட் பிரபு “தி கிரேட்டஸ்ட் ஆஃப் ஆல் டைம்” (The GOAT) எனக் குறிப்பிட்டு விஜய்யின் வீடியோவைப் பகிர்ந்து தனது மகிழ்ச்சியை வெளிப்படுத்தியிருந்தார். தற்போது மற்ற முன்னணி நட்சத்திரங்களும் வரிசையாக வாழ்த்து கூறி வருவதால், தவெக தொண்டர்கள் மற்றும் விஜய் ரசிகர்கள் இரட்டிப்பு உற்சாகத்தில் உள்ளனர். தமிழகத்தின் அடுத்த முதல்வர் யார் என்பதைத் தீர்மானிக்கும் சக்தியாகத் தவெக உருவெடுத்துள்ளதால், வெற்றிக் கொண்டாட்டங்கள் இப்போதே களைகட்டத் தொடங்கிவிட்டன.
