🕉️ கைலாசநாதர் கோவிலில் சிறப்பு அபிஷேகம்

திருப்போரூர் பிரணவமலையில் பாலாம்பிகை உடனுறை கைலாசநாதர் கோவில் அமைந்துள்ளது. இங்கு ஆடி மாத சோமவார பிரதோஷத்தை முன்னிட்டு விமரிசையாக சிறப்பு வழிபாடு நடைபெற்றது. மாலை 6:00 மணியளவில் சுவாமிக்கு பால், தயிர், மஞ்சள், பன்னீர் உள்ளிட்ட மங்கள திரவியங்களால் சிறப்பு அபிஷேகம் செய்யப்பட்டது. தொடர்ந்து உற்சவர் மற்றும் மூலவருக்கு சிறப்பு அலங்காரம் செய்யப்பட்டு தீபாராதனை நடைபெற்றது.

🔔 உற்சவர் வீதி உலா

பிரதோஷ வழிபாட்டை தொடர்ந்து உற்சவர் கோவிலை சுற்றி மூன்று முறை வலம் வந்தார். இதில் திருப்போரூர் மற்றும் சுற்றுவட்டார கிராமங்களைச் சேர்ந்த ஏராளமான பக்தர்கள் பங்கேற்று சுவாமி தரிசனம் செய்தனர். இதேபோல் செங்கண்மால் கிராமத்தில் உள்ள செங்கண்மாலீஸ்வரர் கோவில், செம்பாக்கம் ஜம்புகேஸ்வரர் கோவில், மாம்பாக்கம் தெய்வநாயகி சமேத முருகநாதீஸ்வரர் கோவில் உள்ளிட்ட பல்வேறு சிவாலயங்களிலும் பிரதோஷ சிறப்பு வழிபாடுகள் நடைபெற்றன.

🚩 முடிச்சூர் சிவாலயத்திலும் சிறப்பு வழிபாடு

ஆடி மாத சோமவார பிரதோஷத்தை முன்னிட்டு முடிச்சூர் மரகதாம்பாள் சமேத ஸ்ரீ மல்லீஸ்வரர் சிவாலயத்திலும் சிறப்பு அபிஷேகம், அலங்காரம் மற்றும் ஆராதனை நடைபெற்றது. தொடர்ந்து பக்தர்கள் சுவாமியை தேரில் எழுந்தருளச் செய்து வீதி உலா அழைத்துச் சென்றனர். இதில் ஏராளமான பக்தர்கள் கலந்து கொண்டு சுவாமி தரிசனம் செய்தனர். விழாவில் பங்கேற்ற பக்தர்களுக்கு சிறப்பு அன்னபிரசாதம் வழங்கப்பட்டது.