வெள்ளகொண்டகரம் – புதுப்பட்டு இடையே ஓங்கூAdd Postர் ஆற்றில் நிரந்தர தடுப்புச்சுவர் அமைக்காததால், வடகிழக்கு பருவமழையின்போது பல கிராமங்கள் வெள்ளத்தால் பாதிக்கப்படும் அபாயம் இருப்பதாக பொதுமக்கள் கவலை தெரிவித்துள்ளனர். 20 ஆண்டுகளாக நிரந்தர தீர்வு கோரி போராடி வரும் நிலையில், தற்போது ரூ.42 லட்சம் செலவில் தற்காலிகமாக மண் கரை அமைக்கும் பணி நடைபெற்று வருகிறது.

🌊 ஆண்டுதோறும் வெள்ள பாதிப்பு

செங்கல்பட்டு மற்றும் விழுப்புரம் மாவட்டங்களின் பிரதான எல்லைப் பகுதியாக ஓங்கூர் ஆறு அமைந்துள்ளது. விழுப்புரம் மாவட்டம் திண்டிவனம் அருகே உள்ள சாரம் ஏரியின் உபரி நீரோடையில் உருவாகும் இந்த ஆறு, சுமார் 42 கி.மீ. பயணித்து மரக்காணம் அருகே வங்கக்கடலில் கலக்கிறது. சுமார் 1,480 சதுர கி.மீ. பரப்பளவில் இரு மாவட்டங்களைச் சேர்ந்த 35 கிராமங்களின் விவசாயம் மற்றும் குடிநீர் தேவைக்கு இந்த ஆறு முக்கிய ஆதாரமாக உள்ளது. ஆற்றை ஒட்டிய பகுதிகளில் 1,500 ஏக்கருக்கும் மேற்பட்ட விவசாய நிலங்களும் உள்ளன.

⚠️ கரை உடைவதால் கிராமங்கள் பாதிப்பு

ஓங்கூர் ஆற்றின் இரு மாவட்ட எல்லைப் பகுதிகளில் தற்போது மண் கரை மட்டுமே இருப்பதால், ஆண்டுதோறும் மழைக்காலத்தில் வெள்ளப்பெருக்கு ஏற்படும்போது கரைகள் உடைந்து வருகின்றன. குறிப்பாக 2015ஆம் ஆண்டு ஏற்பட்ட வெள்ளத்தில் வன்னியநல்லூர், விளாம்பட்டு பகுதிகளில் கரைகள் உடைந்து, வெள்ளகொண்டகரம், புதுப்பட்டு, விளாம்பட்டு, புதுக்குடி, புதுப்பேட்டை, மண்டகப்பட்டு உள்ளிட்ட கிராமங்களில் வீடுகளை வெள்ளநீர் சூழ்ந்தது. குடிசை வீடுகள் சேதமடைந்ததுடன், கால்நடைகள் உயிரிழந்ததாகவும், மக்களின் வாழ்வாதாரம் பாதிக்கப்பட்டதாகவும் கூறப்படுகிறது. கடந்த 10 ஆண்டுகளில் ஏற்பட்ட வெள்ளப்பெருக்கில் 500-க்கும் மேற்பட்ட கால்நடைகள் அடித்துச் செல்லப்பட்டதாகவும், 10-க்கும் மேற்பட்டோர் உயிரிழந்ததாகவும் அப்பகுதி மக்கள் தெரிவிக்கின்றனர்.

🏗️ ரூ.42 லட்சத்தில் தற்காலிக மண் கரை

வெள்ள பாதிப்புக்கு நிரந்தர தீர்வு கோரி மக்கள் பல ஆண்டுகளாக கோரிக்கை விடுத்து வருகின்றனர். இதனிடையே, ஓங்கூர் ஆற்றை ஒட்டியுள்ள நான்கு கிராமங்களில் உடைந்த பகுதிகளை சீரமைத்து தற்காலிகமாக மண் கரை அமைக்க மாவட்ட நிர்வாகம் ரூ.42 லட்சம் ஒதுக்கியுள்ளது. தனியார் ஒப்பந்ததாரர் மூலம் பணிகள் நடைபெற்று வருகின்றன. ஆனால், மழைக்காலத்தில் வேகமாக வரும் வெள்ளத்தை மண் கரைகள் தாக்குப்பிடிக்காது என்பதால், வெள்ளகொண்டகரம் – புதுப்பட்டு இடையே சுமார் 3.2 கி.மீ. நீளத்திற்கு நிரந்தர கான்கிரீட் தடுப்புச்சுவர் அமைக்க வேண்டும் என மக்கள் வலியுறுத்துகின்றனர். இதுகுறித்து நீர்வளத்துறை அதிகாரி ஒருவர் கூறுகையில், தடுப்புச்சுவர் அமைக்க ரூ.20 கோடி நிதி கோரி அரசுக்கு நிர்வாக அறிக்கை அனுப்பப்பட்டுள்ளதாகவும், நிதி கிடைத்ததும் பணிகள் தொடங்கப்படும் என்றும் தெரிவித்தார்.