செய்யூர்–மேல்மருவத்தூர் மாநில நெடுஞ்சாலையில் லாரிகளில் இருந்து சிதறும் மண் சாலையோரங்களில் குவிந்து கிடப்பதால், வாகன ஓட்டிகள் விபத்தில் சிக்கும் அபாயம் ஏற்பட்டுள்ளது.

🚛 கனரக லாரிகளால் சாலை பாதிப்பு

செய்யூர் பகுதி மக்கள் மதுராந்தகம், செங்கல்பட்டு, கூவத்தூர், கல்பாக்கம் உள்ளிட்ட பகுதிகளுக்கு செல்ல செய்யூர்–மேல்மருவத்தூர் மாநில நெடுஞ்சாலையை பயன்படுத்தி வருகின்றனர். தினமும் 1,000-க்கும் மேற்பட்ட வாகனங்கள் செல்லும் இந்த சாலையில், கொளத்தூர், சரவம்பாக்கம், கீழ்கரணை உள்ளிட்ட பகுதிகளில் செயல்படும் கல்குவாரிகளில் இருந்து செல்லும் கனரக லாரிகளால் சாலை சேதமடைந்து வருகிறது. 🚧

⚠️ சாலையில் குவியும் மண்

மேலும், தனியார் தார் தொழிற்சாலைகளுக்கு ஜல்லி, எம்-சாண்ட் உள்ளிட்ட கட்டுமானப் பொருட்களை ஏற்றிச் செல்லும் லாரிகள், தார்பாய் மூலம் மூடாமல் செல்வதாக கூறப்படுகிறது. இதனால் லாரிகளில் இருந்து மண் மற்றும் கட்டுமானப் பொருட்கள் சாலையில் சிதறி விழுகின்றன. தொடர்ந்து மண் தேங்குவதால், சாலையோர பகுதிகள் குவியல்களாக மாறியுள்ளன. இதனால் இருசக்கர வாகன ஓட்டிகள் நிலைதடுமாறி விபத்தில் சிக்கும் அபாயம் ஏற்பட்டுள்ளது.

😷 தூசி பறப்பதால் வாகன ஓட்டிகள் அவதி

கனரக வாகனங்கள் செல்லும்போது சாலையில் தேங்கி கிடக்கும் மண் காற்றில் பறந்து, வாகன ஓட்டிகளின் கண்களில் விழுகிறது. குறிப்பாக இருசக்கர வாகனங்களில் செல்வோர் தூசியால் பெரும் சிரமத்திற்கு ஆளாகின்றனர். எனவே, சாலையோரங்களில் குவிந்து கிடக்கும் மண் மற்றும் கட்டுமானப் பொருட்களை உடனடியாக அகற்றவும், பொருட்களை ஏற்றிச் செல்லும் லாரிகளில் கட்டாயம் தார்பாய் மூடப்பட்டுள்ளதா என்பதை கண்காணிக்கவும் சம்பந்தப்பட்ட அதிகாரிகள் நடவடிக்கை எடுக்க வேண்டும் என வாகன ஓட்டிகள் கோரிக்கை விடுத்துள்ளனர்.