அதிமுகவில் இருந்து விலகி, தமிழக வெற்றிக் கழகத்தில் (தவெக) இணைந்த சட்டமன்ற உறுப்பினர் மரகதம் குமரவேலுக்கு சபாநாயகர் சார்பில் நோட்டீஸ் அனுப்பப்பட்டுள்ளது. கட்சித் தாவல் தடைச் சட்டத்தின் கீழ், தங்கள் மீது ஏன் நடவடிக்கை எடுக்கக் கூடாது என்பதற்கு 7 நாட்களுக்குள் விளக்கம் அளிக்குமாறு அதில் குறிப்பிடப்பட்டுள்ளது.
சட்டமன்ற உறுப்பினராக தேர்ந்தெடுக்கப்பட்ட நிலையில், அவர் கட்சியை மாற்றி தமிழக வெற்றிக் கழகத்தில் இணைந்தது தொடர்பாக இந்த நடவடிக்கை எடுக்கப்பட்டுள்ளதாக தகவல் வெளியாகியுள்ளது. இந்திய அரசியலமைப்பின் 10வது அட்டவணையில் உள்ள கட்சித் தாவல் தடைச் சட்ட விதிகளின் அடிப்படையில் இந்த நோட்டீஸ் வழங்கப்பட்டுள்ளதாக கூறப்படுகிறது.
குறிப்பிட்ட காலத்திற்குள் மரகதம் குமரவேல் தனது விளக்கத்தை சபாநாயகரிடம் சமர்ப்பிக்க வேண்டும். அவர் அளிக்கும் பதிலை ஆய்வு செய்த பின்னர், அடுத்தகட்ட நடவடிக்கை குறித்து முடிவு எடுக்கப்படும் என சட்டமன்ற வட்டாரங்கள் தெரிவித்துள்ளன.
இந்த விவகாரம் தமிழக அரசியல் வட்டாரங்களில் பரபரப்பை ஏற்படுத்தியுள்ள நிலையில், சபாநாயகரின் முடிவு முக்கியத்துவம் பெறும் என அரசியல் பார்வையாளர்கள் கருத்து தெரிவித்து வருகின்றனர்.
