மதுராந்தகம் அருகே திருக்கழுக்குன்றம் சாலையில் ரூ.41.50 கோடி மதிப்பில் ரயில்வே மேம்பாலம் அமைக்கப்பட உள்ளதாக மத்திய ரயில்வே அமைச்சர் அஸ்வினி வைஷ்ணவ் தெரிவித்துள்ளார். இதனால் ரயில்வே கேட் மூடப்படுவதால் ஏற்படும் போக்குவரத்து நெரிசலுக்கு தீர்வு கிடைப்பதுடன், 20-க்கும் மேற்பட்ட கிராம மக்கள் பயனடைவார்கள்.

🚧 போக்குவரத்து நெரிசலுக்கு தீர்வு

சென்னை–திருச்சி தேசிய நெடுஞ்சாலை சந்திப்பில் இருந்து கருங்குழி, மேலவலம்போட்டை வழியாக திருக்கழுக்குன்றம் செல்லும் 21 கி.மீ. மாநில நெடுஞ்சாலையில் அரையப்பாக்கம் பகுதியில் ரயில் பாதை சாலையை குறுக்கிடுகிறது. மாமல்லபுரம், கிழக்கு கடற்கரை சாலை பகுதிகளில் இருந்து மதுராந்தகம், மேல்மருவத்தூர், வேடந்தாங்கல் உள்ளிட்ட இடங்களுக்கு செல்லும் வாகனங்கள் இந்த சாலையை அதிகளவில் பயன்படுத்துகின்றன.

🚆 ரயில்வே கேட் மூடுவதால் சிக்கல்

இப்பகுதியில் சாலை மேம்படுத்தப்பட்டு தற்போது ஆயிரக்கணக்கான வாகனங்கள் தினமும் செல்கின்றன. மேலும், விழுப்புரம்–செங்கல்பட்டு இடையேயான ரயில் பாதை அமைக்கப்பட்ட பின்னர் ரயில் போக்குவரத்தும் அதிகரித்துள்ளது. விரைவு மற்றும் சரக்கு ரயில்கள் உள்ளிட்ட 50-க்கும் மேற்பட்ட ரயில்கள் தினமும் இவ்வழியாக செல்கின்றன. ஒரு ரயில் கடந்து செல்லும்போது சுமார் 30 நிமிடங்கள் வரை ரயில்வே கேட் மூடப்படுவதால் வாகனங்கள் நீண்ட வரிசையில் காத்திருக்க வேண்டிய நிலை உள்ளது.

🛣️ 20-க்கும் மேற்பட்ட கிராமங்கள் பயன்பெறும்

ரயில்வே கேட் மூடப்படுவதால் மதுராந்தகம்–திருக்கழுக்குன்றம் இடையே உள்ள 20-க்கும் மேற்பட்ட கிராம மக்கள் பாதிக்கப்படுகின்றனர். குறிப்பாக மருத்துவ அவசர காலங்களில் குறித்த நேரத்தில் செல்ல முடியாத நிலை ஏற்படுகிறது. மேலும், பெருங்களத்தூர்–செங்கல்பட்டு நெரிசலை தவிர்த்து மாமல்லபுரம், திருக்கழுக்குன்றம் வழியாக பயணிக்கும் வாகன ஓட்டிகளும் பாதிக்கப்படுகின்றனர். ரூ.41.50 கோடியில் அமையவுள்ள ரயில்வே மேம்பாலம் இந்த பிரச்னைக்கு முக்கிய தீர்வாக அமையும் என எதிர்பார்க்கப்படுகிறது.