ஆவின் பால் கொள்முதல் விலையை லிட்டருக்கு ₹48 ஆக உயர்த்தி வழங்க வேண்டும் என இந்திய கம்யூனிஸ்ட் மாநில செயலாளர் வீரபாண்டியன் அரசுக்கு வலியுறுத்தியுள்ளார்.

தமிழகத்தில் ஆவின் பால் உற்பத்தியாளர்களின் வாழ்வாதாரத்தைப் பாதுகாக்கும் வகையில் பால் கொள்முதல் விலையை அரசு உடனடியாக உயர்த்தி வழங்க வேண்டும் என்று இந்திய கம்யூனிஸ்ட் கட்சியின் (சிபிஐ) தமிழ்நாடு மாநில செயலாளர் வீரபாண்டியன் தீவிரமாக வலியுறுத்தியுள்ளார்.

இதுதொடர்பாக அவர் வெளியிட்டுள்ள முக்கிய அறிக்கையில், கால்நடை தீவனங்களின் கடுமையான விலை உயர்வு, பராமரிப்புச் செலவுகள் மற்றும் கூலி உயர்வு ஆகியவற்றால் கிராமப்புறப் பால் உற்பத்தியாளர்கள் வரலாறு காணாத நிதி நெருக்கடியைச் சந்தித்து வருகின்றனர் என்று சுட்டிக்காட்டியுள்ளார்.

கடுமையான உழைப்பைச் செலுத்தும் பால் உற்பத்தியாளர்களுக்கு நியாயமான விலை கிடைக்காத காரணத்தால், அவர்கள் பெரும் நஷ்டத்திற்கு ஆளாகும் சூழல் ஏற்பட்டுள்ளது.தொடர்ந்து பேசிய அவர், “அரசுக்குச் சொந்தமான ஆவின் நிறுவனம் பால் கொள்முதல் விலையை ஒரு லிட்டருக்கு ₹48 ஆக உயர்த்தி வழங்க வேண்டும் என்பதை முதன்மை இலக்காகக் கொண்டு பால் உற்பத்தியாளர்கள் சங்கம் தொடர் ஜனநாயகப் போராட்டங்களை முன்னெடுத்து வருகிறது.

விவசாயிகளின் இந்த நியாயமான போராட்டக் கோரிக்கையைக் காலதாமதமின்றி அரசு பரிசீலித்து, உரிய கொள்முதல் விலையை நிர்ணயம் செய்ய வேண்டும்” என்று தெரிவித்தார்.தனியார் நிறுவனங்களின் கடுமையான போட்டிகளுக்கு மத்தியில் ஆவின் நிறுவனத்திற்குத் தடையின்றிப் பால் வரத்து கிடைப்பதை உறுதி செய்யவும், லட்சக்கணக்கான பால் உற்பத்தியாளர்களின் குடும்பப் பொருளாதாரத்தைப் பாதுகாக்கவும் தமிழ்நாடு அரசு இந்த விவகாரத்தில் உடனடியாகத் தலையிட்டுத் தீர்வு காண வேண்டும் என அவர் கேட்டுக்கொண்டார்.