கிறிஸ்தவ தேவாலயங்களில் பணிபுரியும் உபதேசியர்கள் மற்றும் பணியாளர்களுக்கு தமிழக அரசு நல வாரியம் மூலம் பல்வேறு உதவித்தொகைகள் வழங்கப்பட்டு வருகின்றன. தகுதியுள்ளவர்கள் இணையதளம் மூலம் பதிவு செய்து நலத்திட்ட உதவிகளை பெறலாம் என அறிவிக்கப்பட்டுள்ளது.

🔹 8 வகையான நலத்திட்ட உதவிகள் வழங்கல்

கிறிஸ்தவ தேவாலயங்களில் பணிபுரியும் உபதேசியர்கள் மற்றும் பணியாளர்கள் நல வாரியத்தில் பதிவு பெற்ற உறுப்பினர்களுக்கு 2022ஆம் ஆண்டு முதல் பல்வேறு நலத்திட்ட உதவிகள் வழங்கப்பட்டு வருகின்றன. இதில் விபத்து ஈட்டுறுதி உதவித்தொகை, இயற்கை மரண உதவித்தொகை, ஈமச்சடங்கு செலவுத்தொகை, கல்வி உதவித்தொகை, திருமண உதவித்தொகை, மகப்பேறு உதவித்தொகை, மூக்குக்கண்ணாடி செலவுத்தொகை ஈடுசெய்தல் மற்றும் முதியோர் ஓய்வூதியம் உள்ளிட்ட 8 வகையான நலன்கள் அடங்கும். இத்திட்டங்கள் தேவாலய பணியாளர்களின் சமூக மற்றும் பொருளாதார பாதுகாப்பை உறுதி செய்யும் நோக்கில் செயல்படுத்தப்பட்டு வருகின்றன.

🔹 யார் பதிவு செய்யலாம்?

கிறிஸ்தவ இனத்தைச் சேர்ந்த 18 வயது முதல் 60 வயதுக்குட்பட்டவர்கள் இந்நல வாரியத்தில் உறுப்பினராக பதிவு செய்ய தகுதியுடையவர்கள். தேவாலயங்களில் பணியாற்றும் உபதேசியர்கள், வேதியர்கள், சீஷப்பிள்ளைகள், பாடகர்கள், கல்லறை பணியாளர்கள், கிறித்துவ அனாதை இல்லங்கள் மற்றும் தொழுநோயாளியர் மறுவாழ்வு இல்லங்களில் பணிபுரிபவர்கள் இதில் சேரலாம். மாதாந்திர நிரந்தர ஊதியம் இல்லாமல் பணிபுரிபவர்களும் பதிவு செய்து நலத்திட்ட உதவிகளை பெறலாம். உறுப்பினர் பதிவு மற்றும் உதவித்தொகை விண்ணப்பங்களை எளிதாக்குவதற்காக தனி இணையதளம் www.cwb.tn.gov.in உருவாக்கப்பட்டுள்ளது. மேலும் விவரங்களுக்கு மாவட்ட ஆட்சியர் அலுவலகத்தில் உள்ள மாவட்ட பிற்படுத்தப்பட்டோர் மற்றும் சிறுபான்மையினர் நல அலுவலரை தொடர்புகொள்ளலாம்.