செங்கல்பட்டு மாவட்டத்தில் பூர்வீக நிலம் போலி ஆவணங்கள் மூலம் அபகரிக்கப்பட்டதாக 75 வயது முதியவர் மாவட்ட ஆட்சியரிடம் புகார் அளித்து நடவடிக்கை கோரியுள்ளார்.

🏡 பூர்வீக நிலம் அபகரிக்கப்பட்டதாக முதியவர் புகார்

சென்னை தாம்பரம் அடுத்த பெருங்களத்தூர் பகுதியைச் சேர்ந்த ராணி (எ) இந்திராணி (75), தனது தாயாருக்குச் சொந்தமான பூர்வீக நிலம் போலி ஆவணங்கள் மூலம் அபகரிக்கப்பட்டதாக செங்கல்பட்டு மாவட்ட ஆட்சியரிடம் கண்ணீர் மல்க மனு அளித்துள்ளார். மனுவில், வண்டலூர் அடுத்த முருங்கமங்கலம் கிராமத்தில் சர்வே எண் 63/4-ல் அமைந்துள்ள சுமார் 54 சென்ட் நிலம் தனது தாயாரின் சொத்தாக இருந்ததாகவும், தாயார் மறைவுக்குப் பிறகு அந்த நிலம் சட்டப்படி தனது பெயரில் பட்டா மாற்றம் செய்யப்பட்டு பல ஆண்டுகளாக தனது அனுபவத்திலும் சுவாதீனத்திலும் இருந்து வந்ததாகவும் தெரிவித்துள்ளார்.

📄 போலி பவர் ஆஃப் அட்டர்னி மூலம் நிலம் மாற்றப்பட்டதாக குற்றச்சாட்டு

ராணி அம்மாள் அளித்துள்ள புகாரின்படி, கடந்த 2004-ஆம் ஆண்டு ராஜேந்திரன் என்பவர் போலியான ஆவணங்களை தயாரித்து நிலத்தை அபகரிக்க முயன்றதாகவும், அதன் பின்னர் 2005-ஆம் ஆண்டு போலி பொது அதிகாரப் பத்திரம் (Power of Attorney) உருவாக்கி, அதன் அடிப்படையில் கோபால் என்பவருக்கு நிலத்தை முறைகேடாக கிரயம் செய்து கொடுத்ததாகவும் குற்றம்சாட்டப்பட்டுள்ளது. தற்போது அந்த நிலம் கோபாலின் கட்டுப்பாட்டில் இருப்பதாகவும், மேலும் 63/4 என்ற சர்வே எண்ணுக்கு பதிலாக 65/4 என்ற வேறு சர்வே எண்ணைக் குறிப்பிட்டு, இந்த நிலத்துக்கும் தனக்கும் எந்த தொடர்பும் இல்லை என தவறான தகவல்கள் பரப்பப்பட்டு வருவதாகவும் அவர் மனுவில் தெரிவித்துள்ளார். இதனுடன், தன்னை மிரட்டி மனஉளைச்சலுக்கு ஆளாக்கி வருவதாகவும் அவர் வேதனை தெரிவித்துள்ளார்.

⚖️ மாவட்ட ஆட்சியரிடம் நீதி கோரி கண்ணீர் மனு

தனது பூர்வீக சொத்தை மீட்டுத் தர வேண்டும் என்ற கோரிக்கையுடன், கடந்த சில ஆண்டுகளாக பல்வேறு அரசு துறைகள் மற்றும் காவல்துறையினரிடம் புகார் அளித்தும் எந்த நடவடிக்கையும் எடுக்கப்படவில்லை என ராணி அம்மாள் தெரிவித்துள்ளார். இதனால் இறுதி முயற்சியாக செங்கல்பட்டு மாவட்ட ஆட்சியரை நேரில் சந்தித்து மனு அளித்துள்ளார். போலி ஆவணங்கள் தயாரித்து நில மோசடியில் ஈடுபட்டதாகக் கூறப்படும் நபர்கள் மீது உரிய விசாரணை நடத்தி, சட்டப்படி கடுமையான நடவடிக்கை எடுப்பதுடன், தனது பூர்வீக நிலத்தை மீட்டுத் தர மாவட்ட நிர்வாகம் நடவடிக்கை எடுக்க வேண்டும் என அவர் கோரிக்கை விடுத்துள்ளார்.