பழவேலி சாலை வளைவில் சேதமடைந்த இரும்பு தடுப்புகளை உடனடியாக சீரமைத்து, எச்சரிக்கை பலகைகள் அமைக்க வேண்டும் என வாகன ஓட்டிகள் கோரிக்கை விடுத்துள்ளனர்.

🚧 சேதமடைந்த சாலை தடுப்புகள்

செங்கல்பட்டு பழவேலி பகுதியில் சென்னை–திருச்சி தேசிய நெடுஞ்சாலையில் தினமும் பல்லாயிரக்கணக்கான வாகனங்கள் சென்று வருகின்றன. தென்மாவட்டங்களை இணைக்கும் முக்கிய சாலையான இப்பகுதியில், சாலை வளைவு காரணமாக அடிக்கடி விபத்துகள் ஏற்பட்டு உயிரிழப்புகள் நிகழ்வதாக கூறப்படுகிறது. இதையடுத்து நெடுஞ்சாலைத்துறை சார்பில் சாலை வளைவில் இரும்பு தடுப்புகள் அமைக்கப்பட்டிருந்தன.

🚌 விபத்தில் தடுப்புகள் சேதம்

கடந்த மாதம் பழவேலி சாலை வளைவில் கட்டுப்பாட்டை இழந்த தனியார் ஆம்னி பேருந்து மோதியதில் டிப்பர் லாரி கவிழ்ந்து இரும்பு தடுப்பு மீது விழுந்தது. இதில் சாலை தடுப்புகள் சேதமடைந்தன. அவை இதுவரை சீரமைக்கப்படாததால், சென்னை–திருச்சி தேசிய நெடுஞ்சாலையில் செல்லும் வாகன ஓட்டிகள் விபத்தில் சிக்கும் அபாயம் ஏற்பட்டுள்ளதாக தெரிவிக்கப்படுகிறது.

⚠️ விபத்து அபாயத்தை தடுக்க கோரிக்கை

வாகன ஓட்டிகள் கூறுகையில், பழவேலி ஜி.எஸ்.டி. சாலை வளைவில் வேகமாக வரும் வாகனங்கள் கட்டுப்பாட்டை இழந்து அருகில் உள்ள பள்ளத்தில் விழும் அபாயம் உள்ளது. ஏற்கனவே இப்பகுதியில் நடந்த விபத்துகளில் 5-க்கும் மேற்பட்டோர் உயிரிழந்ததுடன், 20-க்கும் மேற்பட்டோர் காயமடைந்ததாக தெரிவித்தனர். மேலும், சாலையில் போதிய எச்சரிக்கை பலகைகள் இல்லாததும் விபத்துகளுக்கு காரணமாக இருப்பதாக கூறினர். எனவே நெடுஞ்சாலைத்துறை அதிகாரிகள் சேதமடைந்த தடுப்புகளை விரைந்து சீரமைத்து, தேவையான எச்சரிக்கை பலகைகளையும் அமைக்க வேண்டும் என கோரிக்கை விடுத்துள்ளனர்.