இயக்குநர் அட்லி இயக்கத்தில் அல்லு அர்ஜுன் நடிக்கும் ‘ராக்கா’ திரைப்படத்தில் நடிகை ஐஸ்வர்யா லட்சுமி முதன்முறையாக நெகட்டிவ் வேடத்தில் நடிக்கிறார்.
இயக்குநர் அட்லி இயக்கத்தில், தெலுங்குத் திரையுலகின் முன்னணி நட்சத்திரம் அல்லு அர்ஜுன் கதாநாயகனாக நடித்து வரும் ‘ராக்கா’ (Raaka) என்ற பிரம்மாண்ட பேண்டஸி திரைப்படத்தில் நடிகை ஐஸ்வர்யா லட்சுமி முக்கிய கதாபாத்திரத்தில் இணைந்துள்ளதாகவும், அவர் முதன்முறையாக வில்லி வேடத்தில் நடிக்கவுள்ளதாகவும் கோலிவுட் வட்டாரங்களில் தகவல் வெளியாகியுள்ளது.
‘ஜவான்’ திரைப்படத்தின் பிரம்மாண்ட வெற்றிக்குப் பிறகு இயக்குநர் அட்லி இயக்கி வரும் திரைப்படம் என்பதால், தொடக்கத்திலிருந்தே இத்திரைப்படத்தின் மீதான எதிர்பார்ப்பு விண்ணைத் தொட்டுள்ளது. சன் பிக்சர்ஸ் நிறுவனம் சார்பில் கலாநிதி மாறன் தயாரிக்கும் இந்தப் பிரம்மாண்ட திரைப்படத்தில், அல்லு அர்ஜுனுக்கு ஜோடியாக பாலிவுட் முன்னணி நாயகி தீபிகா படுகோன் நடிக்கிறார்.
மேலும், பிரபல நடிகைகளான மிருணாள் தாக்கூர் மற்றும் ஜான்வி கபூர் ஆகியோரும் முக்கிய வேடங்களில் நடித்து வருவதாகத் தகவல்கள் தெரிவிக்கின்றன. இந்நிலையில், ‘பொன்னியின் செல்வன்’ படத்தில் பூங்குழலியாக நடித்து ரசிகர்களின் மனதைக் கவர்ந்த திறமைவாய்ந்த நடிகை ஐஸ்வர்யா லட்சுமி, இப்படத்தின் முக்கியக் கதாபாத்திரத்தில் நடிக்க ஒப்பந்தமாகியுள்ளார். இதுவரை நேர்மறையான மற்றும் அழுத்தமான கதாநாயகி வேடங்களில் மட்டுமே நடித்து வந்த ஐஸ்வர்யா லட்சுமி, முதன்முறையாக இந்தப் படத்தில் மிகவும் சவாலான, ‘கிரே ஷேட்’ கொண்ட நெகட்டிவ் வேடத்தில் (Villain role) நடிக்கவுள்ளார் என்பது ரசிகர்களிடையே பெரும் ஆச்சரியத்தையும் எதிர்பார்ப்பையும் ஏற்படுத்தியுள்ளது.
அட்லி – அல்லு அர்ஜுன் கூட்டணியின் மாபெரும் உலகளாவிய பேண்டஸி களத்தில், முன்னணி நட்சத்திரப் பட்டாளத்துடன் இணைந்து ஐஸ்வர்யா லட்சுமி நெகட்டிவ் அவதாரம் எடுப்பது அவரது திரையுலகப் பயணத்தில் ஒரு மிகப்பெரிய திருப்புமுனையாக அமையும் என எதிர்பார்க்கப்படுகிறது.
