சிறுமிகளுக்கு எதிரான குற்றங்கள் தொடர்ந்து அதிகரித்து வரும் நிலையில், 8ஆம் வகுப்பு மாணவியை கடத்திய 19 வயது இளைஞரை அனைத்து மகளிர் காவல் நிலைய போலீசார் போக்சோ சட்டத்தின் கீழ் கைது செய்து சிறையில் அடைத்தனர்.
செங்கல்பட்டு மாவட்டம் கிளாம்பாக்கத்தை அடுத்த காவனூர் பகுதியைச் சேர்ந்த சக்திவேல் (19) என்பவருக்கு, அதே பகுதியைச் சேர்ந்த 14 வயது சிறுமியுடன் பழக்கம் ஏற்பட்டதாக கூறப்படுகிறது. அச்சிறுமி அங்குள்ள பள்ளியில் 8-ஆம் வகுப்பு படித்து வருகிறார்.
சம்பவத்தன்று, சிறுமியை திருமணம் செய்து கொள்வதாக கூறி பெற்றோருக்குத் தெரியாமல் வீட்டை விட்டு வெளியே அழைத்துச் சென்றதாக தெரிகிறது. வீட்டில் இருந்த சிறுமி திடீரென மாயமானதை அறிந்த பெற்றோர் பல இடங்களில் தேடியும் கண்டுபிடிக்க முடியாததால், கிளாம்பாக்கம் அனைத்து மகளிர் காவல் நிலையத்தில் புகார் அளித்தனர்.
புகாரின் பேரில் வழக்குப்பதிவு செய்த போலீசார் தீவிர விசாரணை நடத்தி, மாயமான சிறுமியையும் அவரை அழைத்துச் சென்ற இளைஞரையும் தேடி வந்தனர். விசாரணையில், சிறுமியை ஆசை வார்த்தை கூறி அழைத்துச் சென்று பாலியல் தொந்தரவு கொடுத்தது தெரியவந்ததைத் தொடர்ந்து, சக்திவேலை போலீசார் கைது செய்தனர்.
பின்னர் அவர் மீது போக்சோ சட்டத்தின் கீழ் வழக்குப்பதிவு செய்யப்பட்டு, நீதிமன்றத்தில் ஆஜர்படுத்தப்பட்டு சிறையில் அடைக்கப்பட்டார். மீட்கப்பட்ட சிறுமி பெற்றோரிடம் பாதுகாப்பாக ஒப்படைக்கப்பட்டார்.
இந்த சம்பவம் பெற்றோர்கள் தங்கள் குழந்தைகளின் அன்றாட நடவடிக்கைகளை கவனத்துடன் கண்காணிக்க வேண்டிய அவசியத்தை மீண்டும் உணர்த்தியுள்ளது. அதேநேரம், சிறார்களுக்கு பாதுகாப்பு விழிப்புணர்வை தொடர்ந்து வழங்க வேண்டியதன் முக்கியத்துவத்தையும் எடுத்துக்காட்டுகிறது.
