நரேந்திர மோடி மைதானத்தில் நடைபெற்ற ஐபிஎல் 2026-ன் விறுவிறுப்பான லீக் போட்டியில், குஜராத் டைட்டன்ஸ் அணியை 99 ரன்கள் வித்தியாசத்தில் வீழ்த்தி மும்பை இந்தியன்ஸ் அபார வெற்றி பெற்றது. இந்த வெற்றியின் மூலம் மும்பை அணி தனது 4 தொடர் தோல்விகளுக்கு முற்றுப்புள்ளி வைத்து, சீசனின் இரண்டாவது வெற்றியைப் பதிவு செய்துள்ளது.

முதலில் பேட்டிங் செய்த மும்பை இந்தியன்ஸ் அணிக்குத் திலக் வர்மா தூணாகத் திகழ்ந்தார். வெறும் 45 பந்துகளில் தனது முதல் ஐபிஎல் சதத்தை (101 ரன்கள்) விளாசி அசத்திய அவர், அணியின் ஸ்கோரை 5 விக்கெட் இழப்பிற்கு 199 ரன்கள் என்ற வலுவான நிலைக்குக் கொண்டு சென்றார்.

200 ரன்கள் என்ற இமாலய இலக்கை நோக்கி ஆடிய குஜராத் அணிக்கு ஆரம்பமே அதிர்ச்சியாக அமைந்தது. ஜஸ்பிரித் பும்ரா தனது முதல் பந்திலேயே சாய் சுதர்சனின் விக்கெட்டை வீழ்த்தி குஜராத் அணியைத் திணறடித்தார். மும்பையின் துல்லியமான பந்துவீச்சை எதிர்கொள்ள முடியாமல் குஜராத் அணி 15.5 ஓவர்களில் வெறும் 110 ரன்களுக்குச் சுருண்டது. மும்பை தரப்பில் அறிமுக வீரர் அஷ்வினி குமார் 4 விக்கெட்டுகளையும், அல்லாஹ் கசன்ஃபர் 2 விக்கெட்டுகளையும் வீழ்த்தி வெற்றியை எளிதாக்கினர்.

இந்த வெற்றியின் மூலம் மும்பை இந்தியன்ஸ் அணி 10-வது இடத்திலிருந்து 7-வது இடத்திற்கு அதிரடியாக முன்னேறியுள்ளது. 6 போட்டிகளில் 4 புள்ளிகளுடன் உள்ள மும்பை, சிறந்த நிகர ரன் ரேட் (NRR) காரணமாகச் சென்னை சூப்பர் கிங்ஸ் மற்றும் லக்னோ சூப்பர் ஜெயன்ட்ஸ் அணிகளை விட முன்னிலையில் உள்ளது. தோல்வியடைந்தாலும் குஜராத் அணி 6 புள்ளிகளுடன் 6-வது இடத்திலேயே நீடிக்கிறது.

283 ரன்களுடன் ஹென்ரிக் கிளாசன் முதலிடத்தில் நீடிக்கிறார். குஜராத் கேப்டன் ஷுப்மன் கில் 265 ரன்களுடன் இரண்டாவது இடத்தில் உள்ளார். சிஎஸ்கே-வின் அன்ஷுல் கம்போஜ் 13 விக்கெட்டுகளுடன் முதலிடத்தில் உள்ளார். பிரசித் கிருஷ்ணா 12 விக்கெட்டுகளுடன் இரண்டாவது இடத்திற்கு முன்னேறியுள்ளார்.