சென்னையில் நிலத்தடி நீர்மட்டம் 2021 ஜூலையில் 14.38 அடியாக இருந்த நிலையில், 2026 ஜூலையில் 20.87 அடி ஆழத்திற்கு சரிந்துள்ளதால் மழைநீர் சேகரிப்பை மீண்டும் தீவிரப்படுத்த குடிநீர் வாரியம் முடிவு செய்துள்ளது.

💧 வேகமாக சரியும் நிலத்தடி நீர்மட்டம்

சென்னையில் மக்கள் தொகை மற்றும் மாநகர எல்லை விரிவடைந்து வருவதால் குடிநீர் தேவை தொடர்ந்து அதிகரித்து வருகிறது. புழல், பூண்டி உள்ளிட்ட ஏரிகள் மற்றும் நெம்மேலி கடல்நீர் சுத்திகரிப்பு நிலையங்கள் மூலம் தினமும் 126 கோடி லிட்டர் குடிநீர் வழங்கப்பட்டாலும், மாநகராட்சி விரிவாக்க பகுதிகளில் குடிநீர் திட்டம் முழுமையாக சென்றடையாததால் நிலத்தடி நீர் அதிகளவில் உறிஞ்சப்படுகிறது. இதனால் தனியார் லாரி குடிநீர் பயன்பாடும் அதிகரித்துள்ளது. கடந்த ஜூலை மாதத்தில் சென்னை மாநகராட்சியின் பல மண்டலங்களில் நிலத்தடி நீர்மட்டம் சரிந்த நிலையில், மாதவரம், தண்டையார்பேட்டை, திரு.வி.க. நகர், ஆலந்தூர், சோழிங்கநல்லூர் பகுதிகளில் மட்டும் சுமார் 3 அடி வரை குறைந்துள்ளது.

🌧️ கைவிடப்பட்ட மழைநீர் சேகரிப்பு திட்டம்

சென்னையில் நிலத்தடி நீர் சரிவுக்கு மழைநீர் நிலத்திற்குள் செல்வதற்கான வாய்ப்புகள் குறைந்ததும் முக்கிய காரணமாக கூறப்படுகிறது. தார் மற்றும் கான்கிரீட் சாலைகள், வடிகால் அமைப்புகள் அதிகரிப்பு, மழைக்காலத்தில் சேகரிக்கப்படும் தண்ணீர் கால்வாய்கள் வழியாக கடலில் கலப்பது ஆகியவற்றால் நிலத்தடி நீர் நிரம்புவது பாதிக்கப்பட்டுள்ளது. கடந்த 2003ம் ஆண்டு மழைநீர் சேகரிப்பை கட்டாயமாக்கிய திட்டத்தால் சென்னையின் பல பகுதிகளில் நிலத்தடி நீர்மட்டம் உயர்ந்தது. ஆனால், அடுத்தடுத்த ஆண்டுகளில் பராமரிப்பு மற்றும் கண்காணிப்பு குறைந்ததால் பல வீடுகள், கட்டடங்களில் அமைக்கப்பட்ட மழைநீர் சேகரிப்பு கட்டமைப்புகள் செயலிழந்ததாக கூறப்படுகிறது. இதுவும் தற்போதைய நிலைக்கு முக்கிய காரணமாக பார்க்கப்படுகிறது.

🚨 வீடு, வணிக கட்டடங்களில் ஆய்வு

நிலத்தடி நீர் மேலும் சரிவதை தடுக்க, சென்னை குடிநீர் வாரியம் வீடுகள் மற்றும் வணிக கட்டடங்களில் மழைநீர் சேகரிப்பு கட்டமைப்புகள் முறையாக உள்ளதா என ஆய்வு செய்ய திட்டமிட்டுள்ளது. பழுதடைந்த அல்லது முறையாக பராமரிக்கப்படாத கட்டமைப்புகளை சீரமைக்க கட்டட உரிமையாளர்களுக்கு அறிவுறுத்தப்படும். இடவசதி இருந்தும் மழைநீர் சேகரிப்பு அமைக்காதவர்களுக்கு அபராதம் விதிக்கவும் முடிவு செய்யப்பட்டுள்ளது. மேலும், மாநகராட்சி, நெடுஞ்சாலை மற்றும் நீர்வளத்துறை சார்பில் அமைக்கப்படும் வடிகால்கள், கால்வாய்களுடன் மழைநீர் சேகரிப்பு கட்டமைப்புகளை ஒருங்கிணைக்க வலியுறுத்தப்பட்டுள்ளது. பருவமழைக்கு முன் இந்த பணிகளை தீவிரப்படுத்தி, நிலத்தடி நீரை பாதுகாக்க பொதுமக்களின் ஒத்துழைப்பையும் குடிநீர் வாரியம் கோரியுள்ளது.