செங்கல்பட்டு மாவட்டத்தில் உள்ள ஒன்பது நீதிமன்றங்களில் நிலுவையில் உள்ள வழக்குகளை சமரச மையங்கள் மூலம் தீர்வு காணலாம் என நீதிமன்ற நிர்வாகம் தெரிவித்துள்ளது.

⚖️ 9 இடங்களில் சமரச மையங்கள்

செங்கல்பட்டு மாவட்ட நீதிமன்ற கட்டுப்பாட்டில் செங்கல்பட்டு, மதுராந்தகம், செய்யூர், திருக்கழுக்குன்றம், திருப்போரூர், சோழிங்கநல்லூர், தாம்பரம், பல்லாவரம், ஆலந்தூர் ஆகிய ஒன்பது இடங்களில் நீதிமன்றங்கள் செயல்பட்டு வருகின்றன. இங்கு நிலுவையில் உள்ள தகுதியான வழக்குகளை, இரு தரப்பினரின் ஒப்புதலுடன் சமரச மையங்கள் வாயிலாக விரைந்து தீர்வு காணும் வசதி ஏற்படுத்தப்பட்டுள்ளது.

🤝 விடுமுறை நாட்களிலும் செயல்படும்

நீதிமன்ற வளாகங்களில் அமைந்துள்ள சமரச மையங்கள், சனி மற்றும் ஞாயிறு உள்ளிட்ட விடுமுறை நாட்களிலும் செயல்படும் என மாவட்ட நீதிமன்ற நிர்வாகம் தெரிவித்துள்ளது. இதன் மூலம் நீதிமன்றத்தில் நீண்டகாலமாக நிலுவையில் உள்ள வழக்குகளை, வழக்குத் தரப்பினர்கள் நேரடி சமரச பேச்சுவார்த்தை மூலம் சுமுகமாக முடித்துக்கொள்ள வாய்ப்பு ஏற்பட்டுள்ளது.

📄 வழக்கறிஞர்கள் மெமோ தாக்கல் செய்யலாம்

சமரச முறையில் வழக்குகளை தீர்த்துக்கொள்ள விரும்பும் வழக்கின் தரப்பினர்கள் மற்றும் வழக்கறிஞர்கள், அதற்கான மெமோவை சம்பந்தப்பட்ட நீதிமன்றங்களில் தாக்கல் செய்ய வேண்டும். இதன் பின்னர் வழக்கு சமரச மையத்திற்கு அனுப்பப்பட்டு, இரு தரப்பினரிடையே பேச்சுவார்த்தை நடத்தி தீர்வு காணப்படும். இந்த வாய்ப்பை வரும் டிசம்பர் 31ம் தேதி வரை பயன்படுத்திக் கொள்ளலாம் என நீதிமன்ற நிர்வாகம் அறிவுறுத்தியுள்ளது.