ஊரப்பாக்கம் பள்ளி பேருந்து விபத்தில் இருசக்கர வாகனத்தில் சென்ற தாய் மற்றும் மகள் சம்பவ இடத்திலேயே உயிரிழந்த சம்பவம் அப்பகுதியில் பெரும் சோகத்தையும் அதிர்ச்சியையும் ஏற்படுத்தியுள்ளது.

சென்னை அடுத்த ஊரப்பாக்கம் பகுதியில் தாய் தேவி (45), அவரது மகள் சுவாதி (23) ஆகிய இருவரும் இருசக்கர வாகனத்தில் சென்று கொண்டிருந்தனர். அப்போது அவ்வழியாக வந்த தனியார் பள்ளி பேருந்து எதிர்பாராத விதமாக அவர்கள் சென்ற இருசக்கர வாகனத்தின் மீது பலமாக மோதியதாக கூறப்படுகிறது.

இந்த விபத்தில் இருசக்கர வாகனத்தில் இருந்து நிலைதடுமாறி கீழே விழுந்த தாய், மகள் மீது பேருந்தின் சக்கரம் ஏறி இறங்கியதில் இருவரும் பலத்த காயமடைந்து சம்பவ இடத்திலேயே பரிதாபமாக உயிரிழந்தனர்.

இதுகுறித்து தகவல் அறிந்த தாம்பரம் போக்குவரத்து புலனாய்வு பிரிவு போலீசார், சம்பவ இடத்திற்கு விரைந்து சென்று, உயிரிழந்த இருவரின் உடல்களையும் கைப்பற்றி பிரேத பரிசோதனைக்காக குரோம்பேட்டை அரசு மருத்துவமனைக்கு அனுப்பி வைத்தனர்.

விசாரணையில், உயிரிழந்த தேவி மற்றும் சுவாதி ஆகிய இருவரும் கீழ்ப்பாக்கம் தமிழ்நாடு குடியிருப்பு பகுதியைச் சேர்ந்தவர்கள் என்பது தெரியவந்துள்ளது.

மேலும், உயிரிழந்த சுவாதிக்கு திருமணம் நிச்சயம் செய்யப்பட்டு இருந்ததாகவும், அடுத்த மாதம் அவருக்கு திருமணம் நடைபெற இருந்ததாகவும் கூறப்படுகிறது. திருமணம் நடைபெற இருந்த நிலையில் சுவாதி தனது தாயுடன் விபத்தில் உயிரிழந்த சம்பவம், அவர்களது குடும்பத்தினர் மற்றும் உறவினர்களிடையே பெரும் சோகத்தை ஏற்படுத்தியுள்ளது.

இந்த ஊரப்பாக்கம் பள்ளி பேருந்து விபத்து தொடர்பாக, தாம்பரம் போக்குவரத்து புலனாய்வு பிரிவு போலீசார் வழக்குப்பதிவு செய்து விசாரணை மேற்கொண்டு வருகின்றனர். குறிப்பாக விபத்துக்கான காரணம் மற்றும் பேருந்து ஓட்டுநரின் பங்கு குறித்து போலீசார் தீவிரமாக விசாரித்து வருகின்றனர்.

பரபரப்பான சாலையில் நடைபெற்ற இந்த கோர விபத்து சம்பவம் அப்பகுதி மக்களிடையே பெரும் அதிர்ச்சியை ஏற்படுத்தியுள்ளது. ஒரே குடும்பத்தைச் சேர்ந்த தாய் மற்றும் மகள் உயிரிழந்ததுடன், மகளுக்கு அடுத்த மாதம் திருமணம் நடைபெற இருந்த தகவல் வெளியாகியுள்ளதால், இச்சம்பவம் அப்பகுதி மக்களிடையே மேலும் சோகத்தை ஏற்படுத்தியுள்ளது.

#ஊரப்பாக்கம் #பள்ளிபேருந்துவிபத்து #விபத்து #செங்கல்பட்டு #கூடுவாஞ்சேரி #தாம்பரம் #சாலைபாதுகாப்பு #ChengalpattuNews #Urapakkam #SchoolBusAccident