கூடுவாஞ்சேரி ஜோஹோ நிறுவனம் சார்பில் சுற்றுச்சூழல் பாதுகாப்பை வலியுறுத்தி 1,300-க்கும் மேற்பட்டோர் பங்கேற்ற பிரம்மாண்ட சைக்கிள் விழிப்புணர்வு பேரணி நடைபெற்றது.
சுற்றுச்சூழல் பாதுகாப்பு மற்றும் பசுமைப் பயணத்தை வலியுறுத்தி, செங்கல்பட்டு மாவட்டம் கூடுவாஞ்சேரி அருகே உள்ள பிரபல தனியார் மென்பொருள் நிறுவனமான ‘ஜோஹோ’ (Zoho) வளாகத்தில் பிரம்மாண்ட சைக்கிள் விழிப்புணர்வு பேரணி நடைபெற்றது.
எரிபொருள் பயன்பாட்டைக் குறைத்து, பூமிப் பந்தைப் பசுமையாகப் பாதுகாக்க வேண்டும் என்ற உயரிய நோக்கில் நடத்தப்பட்ட இந்த விழிப்புணர்வு பேரணியில் 1,300-க்கும் மேற்பட்டோர் மிகவும் உற்சாகத்துடன் கலந்துகொண்டனர். பங்கேற்பாளர்களின் உடல் தகுதி மற்றும் வசதிக்கு ஏற்ப 25 கிலோமீட்டர், 50 கிலோமீட்டர் மற்றும் 100 கிலோமீட்டர் என மூன்று தனித்தனிப் பிரிவுகளின் கீழ் இந்தச் சைக்கிள் பேரணி மற்றும் போட்டிகள் திட்டமிட்டு நடத்தப்பட்டன.
முன்னதாக, பேரணி தொடங்குவதற்கு முன்பாகப் பங்கேற்பாளர்களை உற்சாகப்படுத்தும் வகையில் பல்வேறு கலை நிகழ்ச்சிகள் நடைபெற்றன. தமிழ்நாட்டின் பாரம்பரியமிக்க தப்பாட்டம் மற்றும் சினிமா பாடல்களுக்கான நடன நிகழ்ச்சிகள் அரங்கேற்றப்பட்டு, ஜோஹோ வளாகமே விழாக்கோலம் பூண்டது.
கலை நிகழ்ச்சிகளைத் தொடர்ந்து, முக்கிய விருந்தினர்களால் முறைப்படி கொடியசைக்கப்பட்டுச் சைக்கிள் பேரணி தொடங்கி வைக்கப்பட்டது. சுற்றுச்சூழல் விழிப்புணர்வை மையமாகக் கொண்டு நடத்தப்பட்ட இந்த ஆரோக்கியமான முயற்சி, அப்பகுதி மக்களிடையே பெரும் வரவேற்பையும் பாராட்டையும் பெற்றது.
