400 படங்களுக்கும் மேல் நடித்த பழம்பெரும் நடிகை பத்மஸ்ரீ சவுகார் ஜானகி (94) சென்னையில் உடல்நலக்குறைவால் காலமானார். முதல்வர் விஜய் உள்ளிட்டோர் இரங்கல்.
தென்னிந்தியத் திரையுலகின் பொற்கால சகாப்தமும், பத்மஸ்ரீ விருது பெற்ற தலைசிறந்த குணச்சித்திர நாயகியுமான பழம்பெரும் நடிகை சவுகார் ஜானகி (94), வயது மூப்பு மற்றும் உடல்நலக் குறைவு காரணமாகச் சென்னையில் சிகிச்சை பலனின்றி காலமானார்.
ஆந்திர மாநிலம் ராஜமுந்திரியில் பாரம்பரியமிக்க குடும்பத்தில் 1931-ஆம் ஆண்டு டிசம்பர் 12 அன்று பிறந்த ஜானகி, திரையுலகிற்குள் நுழைவதற்கு முன்பாக அகில இந்திய வானொலியில் பணியாற்றி வந்தார். 1950-ஆம் ஆண்டு வெளியான ‘சவுகார்’ திரைப்படம் இமாலய வெற்றி பெற்றதைத் தொடர்ந்து, அவரது பெயரோடு ‘சவுகார்’ என்ற அடைமொழியும் நிரந்தரமாக ஒட்டிக்கொண்டது. இளம் வயதிலேயே திருமணம் முடிந்து ஒரு குழந்தைக்குத் தாயான நிலையிலும், சமூகத் தடைகளை உடைத்தெறிந்து சினிமாவில் சாதித்துக் காட்டிய பெண் ஆளுமையாகத் திகழ்ந்தார்.
தமிழ், தெலுங்கு, கன்னடம், மலையாளம் மற்றும் இந்தி என 400-க்கும் மேற்பட்ட திரைப்படங்களில் நடித்துள்ள இவர் எம்.ஜி.ஆர், சிவாஜி கணேசன், ஜெமினி கணேசன், என்.டி.ராமாராவ், நாகேஸ்வரராவ், ராஜ்குமார், பிரேம் நசீர் உள்ளிட்ட அனைத்து முன்னணி நட்சத்திரங்களுடனும் ஜோடியாகவும் முக்கிய வேடங்களிலும் நடித்துள்ளார். வெறும் கதாநாயகியாக மட்டுமே சுருங்கிவிடாமல், எந்தக் கதாபாத்திரம் கொடுக்கப்பட்டாலும் தத்ரூபமாக நடித்து, தான் நடித்த அனைத்து மொழிகளிலும் சொந்தக் குரலிலேயே டப்பிங் பேசித் தனி முத்திரை பதித்தார்.
இவரது கலைச்சேவையைப் பாராட்டி மத்திய அரசு 2022-ஆம் ஆண்டு ‘பத்மஸ்ரீ’ விருது வழங்கி கௌரவித்தது. மேலும் ‘இரு கோடுகள்’ படத்திற்காகத் தமிழக அரசின் சிறந்த நடிகை விருது மற்றும் ஆந்திர அரசின் நந்தி விருதுகளையும் வென்றுள்ளார். இவரது கணவர் சங்கரமஞ்சி ஸ்ரீனிவாசராவ் ஏற்கனவே மறைந்துவிட்ட நிலையில், யக்ஞ பிரபா கோட்டி, சாச்சி ராவ் என்ற இரு மகள்களும், வெங்கடரமண சங்கரமஞ்சி என்ற மகனும் உள்ளனர். இவரது மறைவுக்குத் திரையுலகினர் கண்ணீர் அஞ்சலி செலுத்தி வருகின்றனர். முதல்வர் விஜய் விடுத்துள்ள இரங்கல் செய்தியில், “தனித்துவமான நடிப்பால் ரசிகர்களின் மனதில் நீங்கா இடம்பிடித்த சவுகார் ஜானகியின் கலைப்பணி போற்றத்தக்கது; அவரது மறைவு திரையுலகிற்கு பேரிழப்பு” எனத் தனது ஆழ்ந்த இரங்கலைப் பதிவு செய்துள்ளார்.
